German champion, Bundesliga-ah tlawm nei lo va khel 35 chhung zet kaltluang tawh Bayer Leverkusen chu an tlawm ve ta nge nge. Leverkusen hian inrinni zana an mikhual RB Leipzig lamah 2-0 in hmahruai hman mah se 2-3 in tlawm zawkah an tang. Leverkusen hnehtu RB Leipzig in inlehthalna lian an thlentir.
Xabi Alonso hnuaia khel tha tak Bayer Leverkusen hian BayArena-a an mikhual RB Leipzig lakah an khel tha viau a, chawlhlawk hmain goal hnih an thun hman. An mualah hmahruai zawkah tan mah se season liam taa an tih thin an khingpuite lehthal thin kha an chungah a thleng a, lehthalin an awm ve ta. Leverkusen tan hian Jeremie Frimpong chuan minute 38-naah hmahruaina goal a thun a. Chawlhlawk dawn hnaih minute 45-naah Alejandro Grimaldo chuan an goal hnihna a thun belh zui leh bawk.
Mualneitu lakah si hnih phur hmasa mah se RB Leipzig an hnual lova, an buai hek lo. Na takin an khingpuite an nawr let a, Kevin Kampl chuan minute 45’+7-ah goal thunin an si phurh a sut then. RB Leipzig hian hnufual zawk ni chungin chawlhlawk hmang mah se chawlhlawk hnu lamah goal an thun leh thuai. Minute 57-naah Loïs Openda chuan goal thunin an si phurh a sut zo ta nge nge.
Goal hnih ve ve an thun hnuin hun rei tak chhung goal a luh belh thei lova, goal thun tumin an inawr tawn nasa hle. Goal a luh belh theih loh reng hnuin mikhual team RB Leipzig in a tawp an khar tha. Hun tawp dawn hnaih minute 80-naah Lois Openda chuan RB Leipzig hmahruai letna goal a thun a, he goal hi champion lai Leverkusen in an sut thei lo tluan a, hun rei tak hnuah an tlawm ve ta nge nge.
Xabi Alonso hnuaia hmasawn tak Bayer Leverkusen hi season liam ta khan an khel tha chungchuang hle. Tlawm nei lovin German Bundesliga-ah an champion a. Europa League final an lut bawk a, Europa League final-ah an tlawm thung. Final-ah Atalanta an hneh loh hi season liam taah Levekusen chak loh awmchhun a ni nghe nghe. Season thara an khelh hmasak berah chak nghal mah se an vawi hnih khelhnaah lehthalin an awm a, an tlawm ve ta tlat thung.