Inrinni khan B. Lalawmpuii (Maawmi), Executive Corporator, Aizawl Municipal Corporation Ward No. IX vawngtu chuan a bial chhunga zirlaite tan Solar Lighting System (SLS) a sem a. Semna inkhawm tawiah hian Maawmi chuan thu sawiin, “Tunlai hian duhthusama current eng a ṭhat loh avangin Solar Lighting System hi inverter nei lo, mi harsa zawk te hnena sem a ṭul ka ti a ni,” a ti.
Maawmi chuan Solar Lighting System chu AMC Ward No. IX huam chhunga Local Council te sem turin an kutah a hlan a. Zirlai harsa zawkte leh mahni Ina eizawnna kalpui ten ṭangkai taka an hman theih nan Local Council ten an area-ah inverter nei lo SLS mamawhte fair taka thlang chhuaka, a mamawhte hnena pe turin Executive Corporator chuan a chah a; Solar Lighting System hi 170 a sem chhuak a ni.
Solar Lighting System hlanna hunah hian Local Council lokal te Bawlhhlawh paih dan dinhmun report pe tura Bialtu Corporator-in a sawm angin, Tuithiang, Saron, Dawrpui leh Chhinga Veng ten report an pe a. Local Council tin ten harsatna a awm loh thu leh Bawlhhlawh paih motor ten helper an hruai thu an report a ni. B. Lalawmpuii pawhin bawlhhlawh paih danah Ward No. IX huam chhungah harsatna a awm lo chu lawmawm a tih thu leh Local Council hmalakna avangin lawmthu a sawi a; Local Council nena Bawlhhlawh paih chungchangah mahni veng ṭheuhah theihtawpa ṭan la zel tur leh Faina chungchangah ṭan la zel turin a sawm nghal bawk.
Corporator Maawmi chuan AMC aṭanga Building Permission pek chhuah ten an permit anga an sak leh sak lo lo enpui ṭhin turin LC te chu a ngen a. Tin, permit nei lova In sa an awm chuan AMC-ah a rang lama report pe tura chahin, ”Building Regulation felfai taka kalpui a nih zel theih nan Local council leh AMC kan thawh ho zel a ngai a ni“ a ti.
Executive Corporator B. Lalawmpuii, Ward-IX enkawltu chuan Vawk vulh leh vawk talh chungchangah pawh Ward chhungah hmalakna tur tam tak a awm a, Ward chhunga hmalaknaah hian Local Council member te chu thawhhopuiah a sawm nghal a; Ward chhunga Local Council te nen thawhhona ṭha tak an neih țhin avangin Local Council member zawng zawngte hnenah lawmthu a sawi nghal bawk a ni.