Pathianni zan khan English Premier League 2024-25 khelh chhunzawm a ni a, season thara bul tan tha lo Manchester United chu an tualzawlah ngei Liverpool hneh lovin an tlawm. An match hnuhnunga tlawm zawn United hi 14-naah an awm mek. Pathiani zana inkhel dangah team lian Chelsea leh Tottenham an chak zo lo bawk.
- United tan a na lua e
Manchester United hian EPL a an elpui lian leh an hmelma lian ber Liverpool chu Old Trafford-ah an mikhual. An hmelma lian ber Reds lakah hian si thum fai ngawtin an tlawm a, Reds lakah Red Devils heti zata an tlawm hi an tan a na lua a ni. United manager Erik ten Hag chuan mimal tihsual vanga goal chhuah an ni a, tihsual an nei zeuh zeuh tih loh chu Liverpool nen an inthlauh bik lem loh thu a sawi.
Old Trafford a lenglut Liverpool hian an khel tha viau a, an khingpui United an thuthun. Inkhel tir lamah Trent Alexander Arnold chuan hmahruaina goal a thun a, offside vangin he goal hi hnawl a ni thung. Arnold goal thun hnawl ni mah se chawlhlawk hmain goal hnih an thun hman ta tho thung.
Manager thar Arne Slot hnuaiah phur taka bul tan Liverpool tan hian Luis Diaz chuan Mohamed Salah siamsak tha tak chu awlsam takin a tauh goal a, minute 35-naah hmahruaina goal a thun. Goal an chhuah hnuin United in an si phurh an sut zui teuh viau a, an forward thar Joshua Zirkzee chuan goal thun theihna hun tha a hmuh chu uiawm takin a hloh. United in an hun tha neih an hloh lai hian Liverpool in an hun tha neih an chhawr tangkai a, goal an thun belh zui leh bawk.
Chawlhlawk dawn hnaih minute 42-naah goal hmahruai thuntu Diaz chuan Salah siamsak atang vekin an goal hnihna a thun zui leh a, an hmahruaina a tizau. Liverpool goal hnih thunah hian United midfielder Casemiro mawhpuh theih a ni a, Brazil midfielder tihsual vanga goal hnih chhuah an ni.
Si hnih lai an phurh tawh vangin insiamthat mamawh viau mah se United an insiamtha thei chuang lo va, chawlhlawk hnu lamah goal an chhuah belh leh thuai. Goal hnih siamchhuak tawh Mohamed Salah chuan minute 56-naah Szoboszlai siamsak atangin an goal thumna a thun a, an hmahruaina a tizau. Goal an chhuah belh leh vangin United an talbuai zui viau a, goal tam zawk an chhuah belh teuh hle. Reds tan hian Salah chuan goal thun theihna hun tha tum hnih nei zawn mah se uiawm takin a hlah ve ve a, United an mualpho thui lutuk loh phah.
Red Devils hian Reds laka an si phurh sut tum viau mah se Zirkzee chuan a hun tha nei a hlah nawn leh a, an si phurh an sut thei lo tluan ta a ni. Liverpool lakah an tlawm leh tak vangin United hi vawi hnih an tlawm zawn ta a, khelh thum atangin point thum chiah an la hmu a, 14-naah an awm mek. Hetihlai hian Liverpool erawh chu manager thar Arne Slot hnuaiah an khel tha viau thung a, khelh thum chak zawnin point 9 an hmu a, pahnihnaah an awm mek. Reds hi EPL season kal mekah goal chhuah lo awmchhun an ni nghe nghe.
- Tottenham an tlawm
Pathianni zana inkhel dangah London club lian Tottenham Hotspurs chu Newcastle United hneh lovin an tlawm. Newcastle United tan hian Harvey Barnes leh Alexander Isak ten goal an thun a. Tottenham goal neih chhun hi Newcastle player Dan Burn-a’n minute 56-naah an lama a tih-goal a ni.
Tottenham an tlawm lai hian Chelsea pawh an chak zo lova, an mikhual Crystal Palace nen 1-1 in an inhnehtawk. Chelsea tan hian Nicolas Jackson chuan minute 25-naah hmahruaina goal a thun a. He goal hi Crystal Palace tan Eberechi Eze chuan minute 53-naah a sut a, 1-1 in an inhnehtawk zui ta a ni.