Nimin khan Mizo Zirlai Pawl (MZP) General Headquarters chuan kum tin a lo tih thin danin, “Hnam dang Nupui/Pasal nei lo tura inzirtirna Ni” chu Aizawl khawpui chhunga school hrang hrangah insem darhin, Mizo zirlaite tan hnamdang nupui/pasal nei lo tura inzirtirna hun an hmang.
Hnamdang nupui/pasal nei lo tura inzirtirna hun hi, MZP chuan kum 2015 atang khan kum tin September ni 2-ah an hmang thin a. Aizawl khawpui chhunga school hrang hrangah hun hman niin, he hun hi zirlaite leh zirtirtu ten an hlut hle thin a ni.
Hnamdang nupui/pasal neilo tura inzirtirna niah hian, MZP hruaitute chuan School hrang hrang an tlawh kual a. Mizo zirlaite chu hnam dang nupui pasal nei lo tura fuihin, hnam dang nupui/ pasal neih pawi zia an hrilh a ni.
MZP hruaitute chuan, Mizote chu kan chhehvel hnam dangte nen tehkhin chuan hnam tlemte kan ni a. Kan hnam hi humhalh a ngai takzet a. Chimralna laka kan hnam humhalhna turin hnam dang nupui pasalah i nei lo ang u an ti.
MZP hruaitute chuan, Mizo ten chimral kan hlauh loh hun hi kan ral hun tur a ni an ti a. Mizo hnam danin, Mizo hmeichhia hnam dang pasal nei chu an fate Mizo an nih theih loh dan leh Tribal ni lo pasal an neih phei chuan an fate’n tribal-te hamthatna dawn tur ang an dawn ve theih loh thute an sawi bawk.
MZP in a buatsaih hnamdang nupui/pasal nei lo tura inzirtirna ni hi Mizoram hmun hrang hrangah MZP bultumin neih a ni a, Mizo zirlaiten an hlut hle. MZP chuan hnamdang nupui/pasal nei lo tura inzirtirna hun tha tak siamsak tu school hrang hrang thuneitute chungah thinlung takin lawmthu a sawi tak meuh a ni.
Aizawl khawpui chhunga MZP General Headquarters hruaitute hun hmanna chu hetiang hi a ni:-
- Govt. Mizo High School-ah H. Lalthianghlima, President.
- Govt. KM HSS-ah Chinkhanmanga Thomte, General Secretary.
- Shemford HSS-ah C. Lalhmingsanga, AGS
- Govt. Central HSS-ah Zairemthanga, Treasurer.
- Govt. JL HSS-ah Rothanliana, Fin. Secretary.