Nimin khan ZPM Party chuan chhung inkhawm neiin, he huna thu sawitu Vanlalhlana Minister, PWD etc. chuan Two Wheeler Taxi Permit chu Politics khelh nan hman a tum ve loh thu leh fur laia khawngchhe siam a harsat thu te, mipuite pawhin hrethiam se a duh thu te a sawi.
Hlana chuan, “ZPM Ministry in ni 238 chauh Sorkar nan hun la hmang mahse, Mizoramin hmelthar a hmu chho mek a ni. Mizoram Chief Minister Lalduhoma hi Pathianin kan ram hruai tura a bel ruat niin ka hria a, mi thenkhatten sawichhe thin mahse, a hnung kan zui chhung hian an sawichhiatna leh beihna ang hi a nunah ka la hmu ve lo, Central Sorkara kan Ministerte pawhin kan Chief Minister hi an zahin an ngaisang hle zawk a ni. Tin kan Minister dangte leh kan MLA te pawh hi mi chhuanawm tak tak vek an lo ni a, opposition lama awm ni sela chuan kan huphurh hlein ka ring. Chutiang bawkin Party lama kan hruaitute pawh mi chhuanawm leh mi hmingtha tak takte an ni a, thuneihna insem zai chung changah pawh party dangte hian min tluk lo a ni. Party thenkhatah chuan mi pakhat kutah thuneihna tam tak a awma, an intlawn siak thin a ni. Keini Party ah erawh chuan thuneihna insem zaiin lungrual takin Pathian hruainain ke kan pen mek a ni,” a ti.
Minister chuan, “Mizoram Sorkarin huaisen takin hma a la meka, mipui sawisel leh eptu Party te beihna pawh hmachhawn huamin Zoram siamthat hna kan thawk mek a ni. Aikal lak chungchangah pawh a hlawhtlinna kan hmu meka, kalphung hlui khan mipui rilru a lo chiahhneh taw em em a, siam that pawh a har khawp mai. Nimahsela, harsa ti tak chung leh hrehawm ti tak chungin kan ram siamthathna kan thawk lui mek a ni. Tin Ration Card leh buhfai lak dan chungchangah pawh ring tihkhawng a tul hle a, Sorkar kal tawhte pawhin an tih duh mahse an lo tih ngam loh khawpa thil harsa a ni. Chutih laiin Kalphung thar mipui Sorkar chuan huaisen takin hma kan la a, Ration Card siam rem chungchangah hian eptu Party lam ten mipui rilru kaihpen tumin miharsa zawkte nghawng tur ang hialin sawi thin mahse, Sorkar hmalakna hian harsa zawkte tana phurrit siam a tum lo a ni,” a ti a.
Vanlalhlana Minister chuan, “ Eptu Party ten BJP nena thawk dun tur ang khan min sawi fo thin a, nimahsela, he thu hi an sawi ri ngam tawh lo, kan thawhho lo zia mipuiin an hriat chian em avangin dawtin min puh ngam ta lo a ni. Kan Lok Sabha MP Richard Vanlalhmangaiha pawh BJP nen an thawh dun loh zia mipuiin an hmuh avangin min bei ngam ta lo hial a ni. Mipuite hian ZPM rilru an hriat tawh avangin inthlan awm apiangah chakna min pe chho ta zel a, Party lian ni thin pahnih pawhin min beih rawn chung pawhin hnehna kan chang chho zel a ni.Kan Party hi Pathianin min hruai a ni tih kan hriat a tula, chapo nan erawh kan hmang tur a ni lo,” a ti.
Minister chuan, “Transport Department hi Two Wheeler Taxi Permit pe chhuaktu kan ni a, Sorkar hmasa hun lai khan politics khelh nan leh mite tihlawm nan an lo hmang thin a ni awm e, keini erawh chuan Two Wheeler Taxi hi mipui mamawh aia tam a awm tawh ni a kan hriat avang leh eizawn nana hmang mekte kan tihbuai loh nan politics khelh nan hman kan tum ve lo a ni. Tin, PWD changtu Minister ka nih angin tunlaia kawngchhiat zia leh siam that a tul zia hi ka hre chiang hle a, Department hotute nen ngaihtuahna sengin ruahmanna pawh kan siam a ni. Sorkar hmasa hunlaia kawng siam a ni a, fur khat daih tura kan beisei laiin a daih ta si lova, fur lai a ni a, rem leh rem lo chung pawha kawngchhe siam hna kan thawk chung pawhin a tuk lawkah fur ruahtuiin min tihchhiat sak leh mai thin a ni. Khaw awmdan hian a zir miau si loh avangin mipuite pawhin min hriat thiam ka beisei a ni. Mizoram kawng hi PWD hian a enkawl vek lo a, Public Sector NHIDCL hian Mizoram kawng tam tak hi an enkawl mek a, kawng thenkhat pawh BRTF ten an enkawl mek bawk a ni, kawng chhe siam that kawngah beisei anga an chet chak thin loh avangin PWD hian hma a lak khalh lo thei thin lo a, mipui tan harsatna a thlen kan hlauh thin avangin PWD hi kan che chhuak vat thin zawk a ni,” a ti.
Chhung inkhawma mithar lawmluh hun hmangtu Lalliansawta, President ZPM General Headquarters pawhin thu sawiin, “Vawiin thlenga ZPM Party zawm thar kan la awm reng hi Pathian malsawmna hlu tak a ni a, Kalphung Thar Mipui Sorkar hmalakna hi mipuiin an thlawp hle tih a lantir a ni. Kan Chief Minister, Cabinet Ministers te leh MLA te hmalakna a chhuanawm kan ti a, kan Policy a hlawhtlin theih nana thawhpui tur mi inpe tak tak vawiin thlenga lawmluh tur kan nei hi lawmawm ka ti hle a ni,” a ti bawk.
He hun hi Lalthlamuana General Secretary in kaihruaiin, FP Laikhama’n hunserh a hmanga, mithar lawmluh thusawi ngaihthlak a ni bawk. Nimina chhung inkhawm hi Prof. Lalnilawma Minister RD etc., Lalfamkima, Deputy Speaker leh Lalchhuanthanga MLA ten an telpui a ni.