Mizoram Pradesh Youth Congress Committee (MPYCC) chuan nimin khan thuchhuah siamin, ZPM sorkar kan hrawn mek hnuaiah Aizawl khawpui chhung leh Mizoram hmun hrang hranga in kal pawhna kawngpui a chhe hle. ZPM sorkar chuan fur lai a nih avang ni lovin mimal induhsak zawkna avanga hna hrang hrang an thawh laiin khawpui chhung leh pawn kawngpui a ngaihsak lo hle a. Fûr lai chhuanlama hmanga kawngpui a ngaihsak lo hi lirtheia eizawngte leh a chhawrtu mipui an ngaih pawimawh loh zia a ti chiang hle ah Congres thalai chuan a ngai a ni, an ti.
Congress sorkar kum 2018-a mipuiin chawl rih tura an tih hnua December 15, 2018-a sorkar thar MNF sorkar lakluh a nih khan Ministry hmasa Congress sorkar khan kawngpui siam nan Mizoram PWD ah sum engzat nge a hnutchhiah? tih zawhna Assembly House chhanna aṭanga a landanin cheng nuai 8595.19 a hnutchhiah tih tarlan a ni, an ti a.
Tun sorkar kal ta, MNF sorkar liam ta khan sorkar thara kawngpui siamna atan Mizoram PWD ah cheng engzat nge a hnutchhiah ve tih hi Congress thalai zawhna a ni a. Ministry kal ta khan sum a hnutchhiah ve lo nge ZPM sorkar hian kawng siamna tur pawisa a nei lo tih hi Congress thalai zawhna a ni bawk, tiin.
Pathian leh mipuite zara Congress in ram rorelna hna a chelh lai khan sorkar tirhah January – April inkarah Aizawl khawpui kawng te siam nghal vek a ni thin a, fur thlen hmain fel taka zawh a nih thin avangin Aizawl khawpuiah inkal pawhna kawng chhia sawi tur a awm ngai lo. Kumin 2024 hi kum 30 chhunga Aizawl khawpui kawng chhiat ber kum a ni, tia tarlangin.
ZPM sorkarin kawng siam a ngaihthah em avangin lirtheia eizawng, lirthei hmangtu leh mipui nawlpuiin harsatna nasa taka kan tawk hi Congress thalai chuan pawi a ti takzet a ni. Enchhin tura in zuar, kawngpui tha leh tlo tiam tuten kawng siam aia duhsak zawngte pawisa leh chanvo tha hmanga vur a, mipui phurrit pâwisa eih lova chhiah leh thil man tihsan hi ZPM kalphung a ni a. Saiip puan sin chunga thu belhchian dawl lo sawia hun hmang ZPM sorkar Mizoram mipuiin kan hrawn hi a vanduai thlak hleah Congress thalai chuan a ngai a ni, tiin an thuchhuahah chuan an tarlang.