Nimin khan Mizo National Youth Front (MNYF) bul tumin Aizawl khawpui chhunga motor kawng chhe lutuk thawmṭhat hnatlang neih a ni a. He hnatlang hi MNF General Headquarters Treasurer Lalruatkima chuan a telpui.
Hnatlang bulṭanna ah thusawi in, MNF Gen. Headquarters Treasurer Lalruatkima chuan, Vawiin ah Kawng chhiat lutuk avanga, Mipui leh Lirthei khalh tute thlavang hauha, Kawng siamṭha thuai tura Sorkar muthlu kaihthawhna tura, Aizawl khawpui hmun lun lai ah MNF Ṭhalai bultumin, Kawngchhe siam Hnatlang koh angai ta hial mai hi a pawi tak zet a ni, a ti a.Aizawl khawpui chhung kawngchhia hi MNF sorkar laia an siam a ni, an ti a. A dik, MNF sorkar khan kawng nasa takin a siam ṭhin a, kan kawng pawh a ṭha ṭhin. Hun a lokal deuh a, Traffic heavy lutuk avangin kan kawng siamte chu kum tin danin repair a ngai ṭhin a ni. ZPM sorkar hian Kawng siam ve chu sawi loh mi kawng siam sa pawh repair thei lo kalphung thar kan nei hi a vanduaithlak hle a ni, a ti.
Lalruatkima chuan, Lirthei khalhtu ten kawng khuar dai hlau a, kawngṭha lai an zawn na khawpui ah hian Traffic a jam nasat phah a. School naupang ten School an tlai phah nasa a. Traffic Police te an hah phah em em bawk a ni. Vawiin ah hian mawhphurtu PWD Minister hi a bo nge? Hmalak ngaihna a hre lo zawk? Hnatlangin kan zawn angaih palh a va hlauhawm ve le ? a ti.
Ex Minister Lalruatkima chuan, chhiah tih pun loh min tiamtute khan an sorkar meuh chuan chhiah an ti pung ta vak vak maia, Kum khat chhungin Leiman vawi 2-an khawn mek a, Kawng siamna tur pawh 1st September 2024 aṭang khan mipui ah Petrol/Diesil kan leina aṭangin min khawn mek bawk anih kha. Diesil leh Petrol aṭanga mipui kaltlanga an chhiah lak hian nasa takin thil man, Lirthei chuan man a nghawng dawn a ni, a ti. Nikum 8th December 2023 atangin ZPM sorkar hian thuneihna an chang anih kha, kan kawngte hi fur ruah kan dawn nasat ṭhin avang in working season apiang deuh thaw in thawmṭhat a ngai kumtin ṭhin ani, mahse Sorkar thar chuan working season chhungin Vantlang kawng siamṭhat chu a ngaihthah avangin vawiin kan dinhmun chu a lo ni zo ta a ni, a ti bawk.
ZPM sorkar ve leh a PWD hna hmasa ber chu Chief Minister In Chawlhhmun a mi kawt lai chu Cement Concrete a siam te, PWD Minister kawt lai Sorkar sum hmanga siam nghal a ni, An mahni in ngai pawimawh lo khan mipui tan tiin kan kawngpui te hi lo ngai pawimawh hmasa zawk se vawiin dinhmun hi kan thleng lo tur a ni, a ti bawk.
Zoram in ruahsur nasa avanga chhiatna hrang hrang kan tawh lai mek in Chief Minister ber chu Sap ram ah nuam a tawl mek niin mipui in kan hria a, Sap ram ah a lam zuk zuk mai bawk si anih kha. Vawiin a kan ram dinhmun kan thlir hian lung a awi mawlh lo ani. Chuvang chuan ZPM sorkar hian Bangladesh of the East a min chhuah hma ngei hian Sorkar hi in en let se, a rang thei ang berin Kawng siam hna hi thawk turin kan phut tlat a ni. Kawng hi ṭawngkam thiamna hmanga sawi mam theih ani lo tih hi he Sorkar hian lo hre mawlh teh se, tiin a sawi.