PC party chuan nimin khan thuchhuah siamin, Mizoram sorkarin Minister leh Minister tlukpui mimal in cheina atana mipui sum cheng nuai 110 a hmang tawh nia lang hi PC Party chuan uchuak taka mipuite sum khawh ralna ah kan ngaia, pawi kan ti takzet, an ti.
An thuchhuahah chuan, Mizoram sorkar in hun rei tak sum harsatna a tawk tawh a. Sorkar hnathawk hlawh pawh a hunah kan pe kim thei lo reng a, kan kawngpui te pawhin a chhiat phah a, mipuiin a hun taka electric bill kan pe chung pawhin sorkarin electric bill cheng vaibelchhe tel kan bat reng phah a. Hetiang sum harsatna lak atanga kan chhuah theihnan hian sorkarin inrenchem a ngaih thu sawi rengin mipui pawhin sum renchem zawnga sorkar hmalakna kan thlawp a. Sum hmuh belh tura mipui phur tirit zawnga sorkar hmalakna pawh mipuiin kan dodal phal lo a ni, an ti a.
Hetiang anih lai hian RTI hmanga mipuiin kan lo hriat tak, Minister leh Minister tlukpui te In cheina atana mipui sum cheng nuai 110 lai hman a ni hi PC Party chuan a zialo kan ti hle a ni.
Kan minister leh minister tlukpui, leh kan VIP thenkhat te bungalow leh quarters-ah chengin heng an chenna hi pawisa tam tak taka chei niin chung chuan sawisel a hlawh a. Hemi ni mai lova bungalow emaw quarters pawha cheng lo heng – Cabinet minister K Sapdanga (cheng nuai 12), Vanlalhlana (cheng nuai 12), Lalthansanga (cheng nuai 12), Vanlalthlana (cheng nuai 12) leh PC Vanlalruata (cheng nuai 12) te; Minister of State F Rodingliana (cheng nuai 10), B Lalchhanzova (cheng nuai 10), Prof. Lalnilawma (cheng nuai 10) leh Lalnghinglova Hmar (cheng nuai 10) te leh adviser to CM H Ginzalala (cheng nuai 10) te In chei nana belhkhawma cheng nuai 110 lai hman a ni hi kan ram sum dinhmun atanga thlirin a awm ang lo kan ti hle a ni, tiin.
Kan ram sum dinhmun that loh laia mahni inhaivur zawnga milian te an kal chuan kan dinhmun a chhiat belh zel si a, chuvang chuan, mipui phur tih rit belhchhah zawnga sorkarin sum a tuak pawh mipuiin kan dodal phal loh lai hian sum hnanna kawnga lo insum ve turin kan milian te PC Party chuan kan ngen a ni, an ti a ni.