A kut ruh khi chunga inlan Neeraj Chopra chuan Inrinni khan Belgium khawpui Brussels-a Diamond League season kharna hunah centimetre khat leka pakhatna dinhmun luah pha loin runner-up lawmman silver medal a awrh a, training laia a kut ruh khi chu X-ray film atangin hmuh tur a awm.
Double Olympic medallist javelin thrower Chopra hian Pathianni khan kut ruh khi chunga Diamond League season finale a hmachhawn thu hi a sawichhuak a, heti chung hian 87.86m khawhin gold a awrh pha teuh hle a ni.
Haryana athlete Chopra hian kumin Paris-ah khan kum thum liamta Tokyo-a a gold medal dawn humhim zo loin silver medal awrh mah se season tluanin a mar nghet tha hle a, Diamond League season kharna leh Olympic medal a lak bakah season kal lai international event pakhatah gold medal a awrh bawk a, chu chu Turku, Finland-a June ni 18 Paavo Nurmi Games-ah khan a ni.
Season thara major event a hmachhawn hmasak tur World Championships chu September ni 13-21 chhung hian Tokyo-ah nghah a ni dawn a, tah hian Chopra chuan nikuma a gold medal awrh kha humhim a tum dawn a ni. 85.50m a khawh tlin avangin World Championships hmachhawn tur hian a tling tawh.