- Lalhminghlua Nkb
Never owned hi tute nge an nih a, Mizorama lo buaipuitu hi tute nge an nih ka hre thui lo hle. Mahse, Zoram mipuiin kan hre thum a, Mizoram min chiah hneh hle zawng a nih hi.
Kum 2014/15 bawr chho khan Mizoramah online a thil chah a lar viau tawh mai a, kan intihhmuh nasa viau a nih kha. Khatih hunlai khan bungraw lo thlenna Bluedart hre lo chu Aizawl thalai vengva chinah an vang viau maithei a ni. Online-a thil chah na na na chu a tlawm nge nge si a, eng Association-in emaw an ngai mawh viau mai thinte a nih kha. Khatih lai vel khan Mizoram rorelna sang ber Assembly House-ah Online thil chah chungchang; chhiah leh chhiah lohte thleng thlenga sawihote a nih hial kha. Mahse, online-a thil chah kha a lo tha a niang, a tirah han ngai thei lotu awm mahse hei kan uar telh telh chu a nih hi.
Kum 2017 khan Vishal Megamart a rawn lar leh a. A din tirh vel khan NGO pakhat chuan na takin an do a, bungrua an zawrh tlawm vang nge eng pawl thenkhat emaw pawhin an lo sanghar ar khaw thlir deuh a nih kha. Selna leh epna karah Vishal chu kal zelin Mizo mipui tan thil leina tlawm leh tha tak a ni zel. Aizawl chhung mai bakah thingtlang kilkhawr atangin Vishal kan tih tuah hum ta reng a nih hi. Vishal lo awmte hi a tha a sin.
2024 September thla tirah Never-owned a rawn lar leh ta vak mai, mipuiin kan pan ruih ruiha an bungrua zawng zawng zawrh tur pawh awm tawh lovin an leih zawh sak ta vek mai. Hetiang a nih takah chuan seltu leh ertu an rawn inperh chhuak leh nghal ta luai luai mai. Eng pawh nise India ramah vek kan awm a, India ram ni ve tho Zoram Kristian rama sumdawng bungrua leh dawr thil to thin lutuk reng hi a veiawm em em reng e. Thalai sumdawn thiam leh a nachang hria rawn chhuak zel ula, vairam ni lo Mizoram ngeiah thil tha si tlawm taka kan lei ve hun hi a nghahhlelh awm em em e. Never-owned hi han tanna chhan tur a awm lem lo, mahse a leitute lungawi tak leh lawm taka an siam thei hi an sumdawnna hian fak a phu viau mai.
Online shopping khan do a lo hlawh tawh a, mipui tana tangkai na na na do hneh theih a ni ta lo. Vishal lo luh tirhin an do leh viau mai a, mipui ten man man zawka kan bungrua kan lei theihna Vishal dawr chu do chi a lo ni lo, Aizawl khawpui hi Vishal tel lovin a kim ta lo zawk hial mai. Never-owned a rawn lang leh ta, anni pawh hi Mizoram tan bungthar min kaipuitu ni se. Kan thlang lawk darkar tlemte kal; Silchar, Guwahati, Shillong, Kolkata lama tlawm tak kha Aizawla to tak tak a ni thinte hi a tuar nasatu chu mirethei zawkte tho kan ni. Aizawla sumdawng bungrua a lo tlawm theih zel nan Never-owned hi hma hruaitu hlawhtling tak ni turin an sumdawnna lo thang duang zel rawh se.