- Ruata
TVS chuan an bike chhuanvawr TVS Apache RR 310 kum 2024 model chu an tichhuak thar a, Rs. Nuai 2.75 (ex-showroom) man a ni a, a hma aiin Rs. 3,000 velin a to.
He a man intanna hi a man tlawm ber, quick shifter variant a ni lo thung a. Rawng sen leh Bomber Grey quickshifter nei hi a indawt danin Rs. Nuai 2.92 leh 2.97 a ni thung a. He bike leitute tan hian ‘Build to Order’ package a awm a, hetah hian Dynamic Kit, Dynamic Pro Kit leh Race Replica te duhthlan tur a awm a. A pathum hian, ziah hmasak dan indawt hian Rs. 18,000, Rs. 16,000 leh Rs. 7,000 te sen belh a ngai dawn a ni.
Apache RR 310 tharah hian a landan leh thil hrang hrangah danglamna tlem azawng kan hmu dawn a. A khawl lamah chuan 312.2cc, single-cylinder, liquid-cooled engine tho hmangin power leh torque a pekchhuah tam theih nan a khawl hi an ‘tune’ thung a. Power lamah 38bhp chu 9,800rpm-ah a pechhuak thei tawh a, 29Nm torque chu 7,900rpm-ah a pechhuak thei tawh bawk a ni.
A hma aia hlai zawk throttle body a nei a, compression ratio a sang zawk a, zaa 13 in a airbox a lian zawk bawk a, zaa 10 in a piston a zang zawk bawk a ni. Heng zawng zawng vang hian sec 0.5 velin a che rang zawk tawh dawn a, 6 speed gearbox, bi-directional quick shifter hmang a nei bawk a. Riding mode 4 – Track, Sport, Urban leh Rain a nei bawk a ni.
A pang lama a kawm, a side fairing hi downforce kg 3 vel nei pha turin tihdanglam hret a ni a, hei hian a lirthei a ti nghet viau dawn a. A kentel hrang hrang zingah hian cruise control, 5-inch digital instrument cluster with Bluetooth connectivity leh RT-DSC (Race Tuned Dynamic Stability Control) a nei a. RT-DSC hnuaiah hian cornering cruise control, cornering traction control, slope dependent control, wheelie control, cornering ABS leh rear lift-off control te a tel a ni.