#ZozamTimes Sept. 22: Nagaland-a Hornbill Festival vawi 25-na lo thleng tur atana inbuatsaihna pakhat rock band te inelna – Ticket to Hornbill-a band tha thlan chhuah 30 zingah Mizoram atangin band pathum – The Prophets, Lilac & Jacks leh Terat te an tel.

Ticket to Hornbill-a tel tur hian band tha tak tak band 130-in an zai an thehlut a, heng zing atang hian band tha zual 30 thlan chhuah an ni a, thlan chhuah te hi October ni 18-21, 2024 chhungin Regional Centre of Excellence for Music and Performing Arts (RCEMPA), Jotsoma, Kohima, Nagaland-ah an inel anga, pakhatna atanga pathumna te chu kumina Hornbill Festival vawi 25-na neih turah an inlan ang.

Mizoram atanga thlan zing ami The Prophets leh Lilac & Jacks te chu Zorimawi khawvelah an mikhual tawh lova, Terat erawh hi chu lo la hre lo kan awm a nih pawhin a mak hran lovang. Band thar an ni a, MYC Perhkhuang atanga rawn invawrh Daniel Lalawmpui telna band a ni.

Hornbill rock contest-ah Mizoram atangin kum 2015 khan Reverse Tragedy chu pakhatna an ni tawh a, kum 2017-ah Avora Records pakhatna an ni tawh bawk.

Kum 2019 atangin Hornbill Festival-a rock contest chu tihtawp a ni a, tuntumah hian Hornbill Festival vawi 25-na lo thleng tur pualin a kalphung tlema her danglamin inelna an buatsaih leh ta a. Ticket to Hornbill hi India rama rock band inelnaa lawmman san na ber a ni dawn a, pakhatna lawmman Rs. mtd 2; pahnihna Rs. mtd 1; pathumna Rs. nuai 5 a ni dawn a ni.