Inrinni zan khan English Premier League 2024-25 khelh chhunzawm a ni a, an mualah si thum faia AFC Bournemouth hnehtu Liverpool chu hmahruaitu thar an ni. Inrinni zana inkhel dangah Chelsea an chak laiin Manchester United an chak zo lo thung.
- Reds an kir
Manager thar Arne Slot hnuaia bul tan tha Liverpool hi AFC Bournemouth an hmachhawn hmaa EPL an hmachhawn hnuhnung berah an mualpho a, Anfield-a an mikhual Nottingham Forrest lakah an tlawm ringawt. Notiingham Forrest laka an tlawm hnuin Champions League-ah Italian club lian AC Milan an hneh a. Inrinni zana an khingpui Bournemouth an hneh zui leh a, hnehna nen an kir.
Hmahruaitu thar ni thei dinhmuna ding Liverpool hian an mualah point thum hmuh ngei tumin tan an khawh a, chawlhlawk hmaa gaol thum thunin an khel tha hle. An mualah 3-0 ngawtin chak mah se Reds hi an mualpho leh teuh hle. Inkhel tan atanga minute ngana lekah Bournemouth hian goal an thun nghal. Antoine Semenyo goal thun chu VAR rwn a nih hnuin he goal hi hnawl a ni hlauh a, Reds an him hram. He goal hnawl tak hian Liverpool a kai harh hlauh thung a, thothang tha takin an mikhualte an nawr zui theih phah.
An mualah chet sual nawn tum lo Liverpool tan hian Luiz Diaz chuan hla tak atanga Konate ball vawrh luh chu fuh taka dawn hnuin minute 26-naah hmahruaina goal a thun. Hmahruaina goal an thun hnuin Liverpool an khel tha zual sauh a, goal an thun belh leh thuai. Hmahruaina goal thuntu Luiz Diaz chuan minute 28-naah T. Alexander-Arnold siamsak atangin lei hrulah a pet goal a, an goal hnihna a thun zui leh nghal zat.
Inhnaihchilh taka goal hnih an chhuah zawn vangin Bournemouth an talbuai a, chawlhlawk hmain goal an chhuah belh leh. Reds hian fuh taka an khingpuite an nawr tlang leh hnuin Darwin Nunez chuan minute 36-naah pui zetin a pet goal a, an goal thumna a thun. Chawlhlawk hmaa goal thum an thun hi Reds hian an chakpui a, point thum an hmu ta a ni.
An mualah point thum an hmuh vang leh hmahruaitu ni thei dinhmuna ding Newcastle United an tlawm bawk si vangin Liverpool hi hmahruaitu thar an ni a. Khelh 5 atanga point 12 hmuin Reds hian hma an hruai rih a. Pathianni zanah Manchester City leh Arsenal te an inkhel a, Reds hian an hmahruaina an hloh nghal dawn thung. Manchester City leh Arsenal te inkhela chak zawk zawk hi hmahruaitu thar an ni dawn a. An inhnehtawk a nih chuan City in hma an hruai ang a, pahnihnaah Arsenal an awm ang.
- Chelsea an chak
Inrinni zana inkhel dang, London derby-ah Chelsea chuan 3-0 in mualneitu West Ham United an hneh a, palinaah an inhlangkai.
London stadium a lenglut Chelsea hian an khel tha viau a, minute 47 chhungin goal thum an thun hman. Inkhel tan atanga minute lina lekah Nicolas Jackson chuan Chelsea hmahruaina goal a thun a. Chelsea ah bul a tan that loh vanga sawisel hlawh nasa hman tak Nicolas Jackson hian minute 18-naah an goal hnihna thun an hmahruaina a tizau a. Chelsea goal thumna leh an goal hnuhnung ber hi minute 47-naah Cole Palmer thun a ni.
Sum seng hnem chunga beisei phak lo thin Chelsea an khel tha chho ta viau a, champion thei team an nihzia an lantir. Blues hian khelh nga atanga point 10 hmuin, palinaah an inhlangkai.
- United an chak zo lo.
Season thara bul tan tha lo Manchester United hi Crystal Palace hmachhawn turin Selhurst Park-ah an lenglut. An len luhna mualah khel tha in, goal thun theihna hun tha nei fo mah se Palace si nghak Dean Henderson an paltlang zo lova, goal an thun thei lo tluan. United tan hian Marcus Rashford thlaka inkhel bul tan Alejandro Garnacho chuan inkhel tan tirh lamah goal thun theihna hun tha tak a nei a, Dean Henderson a paltlang zo lo. Argentina rawlthar Garnacho hian hun tha a nei zui leh a, mawi takin si nghak Dean Henderson pet kan tawh mah se goal bar a pet per a, uiawm takin a hun tha a hlah nawn leh. Garnacho pet per let leh hi Bruno Fernandes chuan rang takin pet nawn leh mah se a ni pawhin goal bar a pet per leh tho bawk.
Garnacho leh Fernandes ten an hun tha an hloh bakah hian Matthijs de Ligt leh Lisandro Martinez te pawhin uiawm takin an hun tha neih an hlah ve bawk. United lakah an him hram hram hnuin hun tawp dawn hnaiah Crystal Palace in goal an thun teuh hle. Fuh taka an nawr tlang hnuin Eagles hian goal thun theihna hun tha zet mai an nei a, an hun tha nei hi United si nghak Andre Onana-a’n a tihthlawnsak ve thung. Hun tawp dawn tepah goal thun theihna hun tha nei nawn leh mah se uiawm takin chhawr tangkai zo lo nawn leh a, an mualah an chak zo ta a lo a ni.
Crystal Palace lakah an chak zawh loh vangin United in hma an sawn hleithei lova, khelh 5 atanga vawi hnih chauh la chak United hian point 7 chauh an hmu a, 11-naah an awm mek a ni.
- Newcastle an tlawm
Season thara khel tha tak, khelh li an khelh thlenga tlawm la nei lo Newcastle United chuan inrinni zan khan Craven Cottage-ah Fulham an mikhual a, 3-1 in an chak lo. Fulham lakah an chak loh vangin Newcastle United hian hmahruai theihna hun tha an neih an chhwr tangkai zo ta a lo a ni.
Khelh li atanga point 10 hmu tawh Newcastle lakah Fulham tan Raúl Jiménez, Emile Smith Rowe leh Reiss Nelson ten goal an thun a, Magpies goal neih chhun hi Harvey Barnes thun a ni.
Inrinni zana inkhel dangah Tottenham in 3-1 in Brentford an hneh a, Aston Villa pawhin an mikhual Wolves chu 3-1 in an hneh ve bawk.