Rilru lam hriselna a sawi vangin beih a tawk a, natna danglam a neih thu a sawi hnu-ah umzui a hlawh. Tunah naupai thei a nih loh thu a sawi leh a, an zim luih luih leh. Mahse, a zam lo. Na takin Selena Gomez-i’n a chhanglet.
Social media lamah ‘no’ lutuk leh tawrhzua tak anga chhaih leh koh nawmnah a hlawh mek a, kum 32 mi hian, “Mite hnena tanpui i mamawh dan sawi leh tanpui i ngaihna hriattir hi thil zahthlak a ni lova, tuar zua angah phei chuan inchhuah chi a ni lo,” tiin a sawi.
Hetah hian duhtawk mai lovin, ‘F**K off’ tih tawngkam a hmang zui a, hun harsa tak a tawh laia mental health buaina a neih thu sawichhuaktu hian amah hriatthiam tumna aia demna tawngkam dengkhawng tak tak, social media-a lang thin chu a kham hle.
Lemchan leh rimawi khawvela hriatlar Selena hian 2013 khan lupus natna vanga enkawl a lo ni tawh a, 2017-ah a Kal thlaksak niin, 2018 khan biopolar disorder vanga buaipui a ni bawk.