- R. Lalhmangaiha @ R.Hmaa. Bethlehem
Aizawl khawpuia traffic jam hi Aizawla chengte leh khaw dang atanga rawn tlawhtute tan pawh harsatna siamtu ber leh kan nin ber, kan nitin khawsak nunphung tikhaihlaktu ber a ni. Mi thenkhat thahnem ngai zualten chanchinbu leh media hrangah a tih ziaawm dan tur rawtnate an rawn nei fothin a, hengte hi sorkar hian ui pui tuilian thlir mai lovin, mutmawh hnarmawhah nei se a duhawm hle mai.
Mifing leh rem hre zawk tam takin rawtna an neih thin karah, kei tehlul hian rawtna ka rawn chhawpchhuak ve teh ang.
- SIKUL BUS SIAM SAK VEK SE : Aizawla sikul lar bik, mipuiin an bawh bik deuh ho hian school Bus bik nei vek se, sorkara transport department pawhin a bikin Bus permit pali panga thleng pawhin siamsak mai se, sikul naupang pakhat thlah nan mi khawsa thei deuh chhungkua chuan private motor an hmang zel si a, sikul naupang pahnih khat hruai nana motor hmante hi a tam tham hle a. Mahni sikul Bus theuhah sikul naupang hi sikul kal nan leh haw nan hmang thei deuh vek se, motor vei vak a tlem deuhna na na chuan, tun ai hi chuan kan ziaawm hret awm mang’e.
- MOTOR IN TURN THUT THUT : Kawngpui chep tak tak karah Driver thenkhat chu rem leh rem lovin an inher (turn) thut thut thin. Reilote pawh an inher chhung hian motor a in hnawhkhawm hman nasa hle thin a. Turning Point ni loah hi chuan traffic police-te hian lirthei in turn thut thut thin hi phallohna dan khauh takin kengkawh se, engemaw chen chu awmzia a nei ngei ang.
- KAWNG SIRA LIRTHEI DAH : Bawngkawn leh Kulikawn inkar te, Vaivakawn leh Temple inkar kawngah te hian traffic jam hun lai tak hian kawng sira motor in hung a tam thei hle a. Lirthei a insulpelh dawnin heng kawng sira dahte hian harsatna tam tak a siam thin. Duh aiin AMC parking area pawh hi a tamin a zau mah mah hret bawk. Tin, khawpui laili tak, kawngpui lun lai, dawr kawt leh office kawta motor park tam lutuk hian kawng a tizimin traffic a ti jam thin. Heng ahte hian sorkar hian ngaihtuahna thar hmang teh se.
- STAND LEH DROPING ZONE LO A PASENGER LAK/CHHUKTIR : Bus leh Taxi ho zingah stand loah leh dropping zone lo a, passenger lak leh chhuktir thut thut thin an tam hle a, hei hi kalphung pangngaiah kan nei deuh tawh niin a lang. Motor thui tak a inzui tawh chuan Driver thenkhatin stand loah leh droping zone loa passenger an lak zuai a, an chhuktir zuai chhung hian a hnung lama lirtheite chu nasa takin a lo jam hman thin. Hei pawh hi traffic police-te hian khauh takin dan kengkawh teh se.
- BUNGRAW UNLOAD HUN SIAM SE : Veng laili leh veng kilkhawr deuhah pawh in sa mek leh eng hna hna emaw thawk mekten chhun pachangah cement, rawra, iron rod leh balu-te an unload fo thin a. Hetianga bungrua unload mamawh ngawih ngawihte chuan zing kar motor tam hma emaw, motor tlem hnu zan lamah unload zel tawh se. Hetiang tih ching ho hian traffic jam nasa takin an siam a, thuneitute hian bungraw unload hun hi mumal takin siam se traffic jam engemaw chenah a ziaawm phah ngei ang.
- LINE BUS A LIAN MAH MAH : A bikin Bazarpui to ITI, Mualpui, Bazar to Ramthar kawngte hi one way chauh atana hman tlaka te leh zim a ni a. Heng kawngte hi a lun em em a, heng laia rei tak traffic a jam hian khawpui chhung a nghawng nghal zel a. Heng kawngahte hian Line Bus tlan tir an ni a, Line Bus ni si, main road pangngaia tlan ang thova Bus liante an service tir si a. Bus lian an insulpelh dawn hian rei tak tak traffic a jam a, heng kawngah te chuan Line Bus service tih anih angin Bus te zawk tlantir se nasa takin traffic jam a ziaawm phah ang.
- LIRTHEI CHEH DAN MUMAL ZAWK : Khawi maw lai hmunah traffic police emaw, local council leh road protection lamten parking phallohnaah lirthei dahte an chep a, pawisa an chawitir a, a hnuah a la hre ve loten an dah ve leh mai zel a, traffic jam a ziaawm phah lova, hmasawnna tak tak a thlen chuang lo. Lirthei neitute chuan garrage neih vek tur tih hi a dik em em rualin, hriatthiam harsa ka tih pakhat chu road protection thenkhatten zan reh tawhah traffic jam a awm tawh loh hnuah an veng chhung kawnpui kam leh hmun ruak dangah lirthei neituten an phalna la hmasa lova lirthei an dah changin an chehsak a, an chawitir thin. Hei hi chuan traffic jam a tihziaawm phah lo. Zan lama an duty ai hian chhun lamah check thin zawk se hma kan sawn phah zawk ngei bawk ang.
- ZAN BAZAR SIAM : Zan bazar siam i la, a bikin Millenium Centre hi zan dar 10 thleng hawng se. Foodcourt ang deuh chaw eina emaw, restaurant changtlung tak siam se, zan rei deuh hawn phal bawk se, thalaite intawllenna siam bawk se. Bazarpui ber leh heng lai area vela sumdawng tan a tangkai hle ang. Zan lamah an men rei avangin dawr neitu leh sumdawngten zing lamah dar 11-ah dawr an hawng tawh ang a. Sikul kal leh office kalte chu sumdawng engemaw zatte nen tuna trafic jam hun lai tak hian an innawk buai loh phah ang. Chhuna bazar mamawh ngawih ngawihte khan zanah an bazar phah ang a, engemaw chenah traffic jam a ziaawm phah hle ang.