September 25, Nilai zan khan English Carabao Cup khelh chhunzawm a ni a, champion lai Liverpool chuan West Ham hmachhawnin bul an tan a, awlsam takin hnehna an chang nghal. Awlsam taka Liverpool an chak rual hian Arsenal pawhin awlsam takin hnehna an chang ve bawk.
Champion lai Liverpool hian an mualah bul an ṭan ṭha lova, goal chhuah hmasa zawkag an ṭang. Juventus atanga an lak thar Federico Chiesa chuan a vawikhat nan Reds tan bul an tan a, a che chhe lem viau lo. An mualah khel ṭha viau mah se, Jarell Quansah chuan minute 21 naah an lamah a ti-goal palh a, West Ham hmahruaina goal a thunsak.
Liverpool in goal an chhuah hmasa hi inkhel tihmuhnawm zualtu an a, goal thun tuma ṭan an khawh a hmuhnawm hle. An khingpuite an nawr na bawka goal an thun ta thuai. Minute 25 naah Diago Jota chuan goal thunin an si phurh a sut. Chawlhlawk hmain goal thun belh thei an awm lova, 1-1 a inhnehtawk chungin chawlhlawk an hmang.
Chawlhlawk hmain beisei phak lo mah se chawlhlawk hnu lamah Reds an khel ṭha a, goal li ngawt an thun belh. Second half ṭan aṭanga minute lina lekah Jota chuan hma an hruai letna goal a thun a. Mohamed Salah chuan minute 74 naah an goal thumna thunin, an hmahruaina a tizau.
3-1 hma an hruai hnu hian Gody Gakpo chuan hun tawp dawn hnaiah goal hnih a thun zui leh bawk. Gakpo hian minute 90 leh 90+3 ahte goal a thun a. An trophy kawl mek humhim tura bul an ṭannaah Liverpool in 5-1 ngawtin hnehna an chang ta a ni.
- Nwaneri a inlar
Nilai zana Carabao Cup inkhel dangah champion tura rinkai zinga mi Arsenal chuan 5-1 in Bolton an hneh. Boltan an hneh ṭum hian EPL player naupang ber record siamtu
Ethan Nwaneri chuan goal hnih a thun.
City lakah uiawm taka an chak zawh loh hnuin Arsenal hi ṭha takin an inlan a, championship club Bolton lakah goal nga ngawt an thun. An muala khel ṭha Arsenal tan hian Declan Rice chuan minute 16 na lekah hmahruaina goal a thun. Rice goal thun hnu hian Nwaneri chuan minute 37 naah Arsenal tan a goal hmasa ber a thun a, 2-0 a hmahruai chungin chawlhlawk ang hmang.
Chawlhlawk hnu lamah Arsenal an khel ṭha lehzual a, goal an thun leh thuai. Second half ṭan atanga minute lina lekah rawlthar duhawm Nwaneri chuan an goal thumna a thun. Nwaneri goal hnihna a luh hnu lawk minute 53 naah Aaron Collins chuan Bolton goal khatna thunin an inkar a tizim.
Bolton in goal an thun hnuin Arsenal in goal hnih an thun belh zui leh. Minute 64 naah Chelsea aṭanga an hawh Raheem Sterling chuan Arsenal tan a goal hmasa ber a thun. Sterling hian EPL club lian Liverpool, Manchester City, Chelsea leh Arsenal tan a khel tawh a. Club lian pali tan goal a thun vek bawk a, hnuhma a nei ṭha hle. Sterling goal luh hnu hian Kai Havertz chuan Gunners tan goal khat a thawh ve bawk.
- Fourth round draw
West Ham hnehtu Liverpool hian EPL club an hmachhawn zui leh a ngai dawn a, Season thara khel ṭha tak Brighton an hmachhawn zui leh dawn. Team lian zingah Manchester United leh Arsenal ten khingpui hautak an la nei rih dawn lo. United hian Leicester City an hmachhawn zui leh dawn a, Arsenal in Preston North End an hmachhawn ve thung ang.
Fourth round a inkhel tur zingah Tottenham leh Manchester City inhmachhawn tur chu inkhel lian, inkhel ngaihven hlawh tur a ni ang. Aston Villa leh Crystal Palace pawh a intum tawk viau tura ngaih a ni.