Centre-back ṭha ber pawl ni ṭhin, club lian leh ropui ber pawl Real Madrid leh Manchester United pawha lo khel tawh Raphael Varane chuan kum 31 mi chuah ni chungin a ballboot a khai a. Rin aia hmain football a chawlhsan.
World Cup a France champion pui tawhtu Varane hian Manchester United-a a contract a hmang zova, nipui bazar lai khan Old Trafford a chhuahsan. United a chhuahsan hnuin Italian Serie A club Como chu free transfer in a zawm zui leh nghal.
A club thar Como tan a khelh hmasak berah Varane hian a khupah hliam na tak a tuar nghal. A khup hliam vang hian a tum lawk aia hmain football a chawlhsan a ngai a. Ballboot khai hil turin thu tlukna a siam zui ta a ni. Varane hian player angin football chawlhsan mah se, Como ah hian player ang ni lovin a cham chhunzawm tur thu a sawi.
Varane hian French club Lens aṭangin bul a ṭan. Hma a sawn chak bawk a Lens tan season khat chauh a khel a, khawvela football club hausa ber Real Madrid in kum 2011 khan an la zui nghal.
Real Madrid tan hian kum 10 zet a khel a, Los Blancos tan hian trophy 18 ngawt a chawi. Heng zingah hian Champions League trophy pali leh La Liga title pathum a tel.
Real Madrid ah par a chhuan hnuin kum 2021 khan Manchester United in £34m sengin an la lut. United tan hian inelna hrang hrangah vawi 95 a inlan a, hliamin a tihbuai nasat vangin beisei angin a khel tam thei lo. 2022 khan United hi Carabao Cup ah a champion pui a, FA Cup final ah Manchester City an hneh ṭumin a khel a, hei hi United tan a khelh hnuhnun ber a lo ni ta a ni.
Varane hian France tan vawi 93 a khel a, goal 5 a thun. France hi World Cup leh UEFA Nation League ah a champion pui a. Inelna hrang hrangah hnuhma nei ṭha tak chungin football a chawlhsan.