September 27, Zirtawpni khan LZ Juice MPL 11, round 13-na khelh zawh a ni a, FC Bethlehem hnehtu Ramhlun Athletic FC in semi-final luh theihna beisei thar an nei. Zirtawpnia inkhel dangah Chanmari FC leh Mizoram Police FC te an inhnehtawk ve thung.
Table hnuai lam luahtu pahnih Ramhlun Athletic FC leh FC Bethlehem te inkhelah table mawngphah luahtu FC Bethlehem in bul an tan tha viau a, si hnih ngawtin hma an hruai hman. Chak mamawh RAFC hian hun tawp dawn hnaih lamah goal thum an thun a, an khingpuite hneh letin point thum hlu tak an hmu.
Tlahniam chiang tawh FC Bethlehem hian Ramhlun Athletic FC lakah bul an tan tha viau a, inkhel tan atanga minute rukna lekah Laldintluanga chuan hmahruaina goal a thun nghal. Chawlhlawk hmain goal thun belh thei lo mah se chawlhlawk hnu lamah goal an thun belh leh thuai. Second half tan atanga minute ngana lekah Vanlalmalsawmdawngkima chuan an goal hnihna thunin an hmahruaina a tizau.
Si hnih ngawt an phurh vangin RAFC dinhmun a chhe hman viau a, FC Bethlehem lakah an tlawm a nih chuan an tan semi-final luh phak beisei tur a awm tawh dawn lo. Chak an mamawh zia hrian tan an khawh zui chiam a, goal thum ngawt an thun ta hial. RAFC tan hian Benkamin Lalnunpuia chuan minute 66-naah goal thunin an si phurh a sut then. He goal hian nguai tan tawh RAFC a fuih phur nasa hle.
Benjamin-a goal thun hnu hian Lalnunmawia chuan minute 70-naah goal thunin an si phurh a sut zo. An si phurh sut zawhna goal a thun hnu lawkah Lalnunmawia hian an hmahruaina a thun belh zui leh zat a, 3-2 in hma an hruai. Hnufual zawk an nih hnuin FC Bethehem in tan an khawh thar leh viau a, Kiran Chhetri chuan minute 89 naah goal thunin an si phurh a sut. An inhnehtawk ngei dawna a lan laiin Ramhlun Athletic FC tan Isak Vanlalpeka chuan minute 90+1-ah hma an hruai nawn lehna goal a thun a. He goal hmang hian 4-3 in hnehna an chang a, point 3 hlu tak an hmu ta a ni.
FC Bethlehem lakah an chak vangin RAFC hian khelh 13 atanga point 15 hmuin paruknaah an inhlangkai a, semi-final lut thei dinhmunah an la ding. MPL 11 League round-ah bik match khat chiah a awm tawh a. RAFC hian semi-final lut thei turin an match hnuhnung berah chak ngei ngei an mamawh ang.
Zirtawpnia inkhel dangah Chanmari FC leh Mizoram Police FC te 2-2 in an inhnehtawk a. CFC hian semi-final an lut tawh a. Semi-final lut turin MPFC dinhmun a tha viau tawh bawk.