Nimin khan Hnam Runah chhung inkhawm neih a ni a. He hunah hian Er K Lalsawmvela PWD Engineer in Chief hlui leh MNF General Secretary ni bawk chuan thu a sawi a. “Tuna kan kawng chhiat chhan chu sorkar a inthlahdah vang a ni ber mai. Sorkar hmasa aṭanga an chhawm sum ṭhahnem tak a awm a, chu’ngte hmang chuan kawng an siam lo a ni,” a ti.
PWD Engineer in Chief hlui chuan, “MNF sorkar kal ta chhung khan kawng siamna leh enkawlnaah PWD Minister Pu Zoramthanga khan pawisa a pe ṭha em em a. Survey kan neihnaah Mizoram kawng kha Very good leh good-ah zaa 55%-65% a awm a. Mizoram PWD History-a kawng kan neih ṭhat lai ber a ni,” a ti a. “Hetih lai hian MNF sorkar tawp lamah Covid vangin hri avangin sum a lo harsaa kawng dinhmun pawh tlem chuan a hniam ve hret tih erawh phat theih a ni lo thung,” a ti bawk.
MNF General Secretary chuan Press Conference a neih ṭuma a thusawi, ZPM Spokesman K. Laltluangkima’n a chhanletnaah hriat sual leh sawi sual a nei nual tih a sawi a. “CM-in contractor duhsak takin, hlawkna tem ve a, chantlan duhna avangin, agreement dik lo ziaka PWD Officer a puh kha a dik lo tih ka sawi nawn leh duh a. Dan ang thlapin kha agreement kha ziah a ni,” a ti a. “Tin, ZPM Spokesman-in Kawnpui – Khamrang contract agreement-ah EPC contract kalphunga la awm ngai lo a inzep nuala a sawi hi a vaiin a dik lo vek a, Covid len avanga harsatna tamtak awmin a nghawng denchhena Central in dan a siam danglam thenkhatte kha a hre tel ve lo a ni. A hriat kim loh ah huai takin a ṭawng hi a zialo hle a ni,” a ti bawk.
Er K Lalsawmvela chuan, “ZPM Spokesman hian mi thusawi a chhanletin sorkar hnathawkte vauna lam hawi te, ‘hetianga an awm leh chuan action kan la ang,’ tih te, ‘tute emaw chu hrut zeuh an ni ang’ tih ang chi hi chhakchhuak fo lo se a duh a duhawm hle,” a ti.
Hnam Run Chhung Inkhawm hi K. Lalthawmmawia, Member, PAC in a kaihruai a, R. Liantluanga Adviser-in hunserh a hmang bawk.