Congress Party chuan nimin khan Congress Bhavan-ah Sinlung Hills Council Election lo awm tura Candidate puanna hun an hmang a, Lal Thanzara, President, MPCC chuan Candidate te puanna neih paha thu sawi in, “He inthlan atan hian kan hotuten Nomination Committee an dina, chu mi te chuan thahnemngai taka thawkin, telephone te a be kual a hma la mai lovin, a hmunah te kalin khawtlang hruaitute leh midang tam tak berawn in, an hmalakna azarah Candidate tha tak tak an rawn chhawpchhuak thei a, an chungah kan lawm em em a ni. Tin, kan Candidate atana kan sawm te pawhin ram leh hnam, kan sakhaw him nan kan sawmna an pawm a, ke an rawn pen chhuak hi kan lawm em em a ni. Bial hrang hranga kan hotute chungah pawh lungrual takin kan candidatente tan an thawk thei hi kan lawm em em a ni, a ti.
Thanzara chuan, “Congress party hi remna leh muanna duhtu kan ni a. Tunhma khan unau hmelhai hunlai kha kan nei a, amaherawh chu Congress party chuan an ze ngai an rawn chhuah a, kan sawrkar lai khan kan hotute leh HPC(D) te an inbia a, HPC(D) te chuan silai te 2018 khan an tung ta a, remna leh muanna kan lo nei ta a. Vawiin ni ah chuan Sinlung Hills Council te kan lo nei ta a ni” tia sawiin. “Vawiin ni ah helai bialah remna leh muanna kan lo nei ta hi Congress hmalakna vang a ni tih min lo hriatsak a, kan Candidate te min vote sak turin kan ngen che u a ni,” a ti bawk.
“Sinlung Hills Council inthlanna lo awm turah hian Sawrkarna Congress Party in kan siam anih chuan, Council area chhung ngei, Sakawrdai atang hian Office neiin hna a thawk dawn a. Mauchar leh Saipum inkar hi a fur a thala motor a kal theihna turin hmalak a ni bawk dawn a ni. Vawiin ni ah hian Congress tana thawktute kan chah duh chu, MNF President hi President a an hman chhung leh, ZPM Chief Minister hi ZPM hian an Chief Minister atan an pawm chhung chu Congress party tan hian kawl a eng zel dawn a, mahni khua theuh ah hma lo la zel turin ka sawm che u a ni. “Thufing 21:31 ah kan hmuh angin, ‘Sakawr chu indona atana buatsaih a ni a, mahse hnehna chu Lalpa thu a ni,’ ti a innghat chungin Congress party chuan he inthlan hi kan hmachhawn dawn a ni,” a ti bawk.
Sinlung Hills Council atana Congress Party Candidate te chu:
- Khawlian – Lalrawngbawla, Zuangtui/Khawlian
- Phuaibuang – Lallianzama, Phuaibuang
- Suangpuilawn – M. Dawngliana, Suangpuilawn
- Vanbawng – Lalfakawma, Vanbawng
- Ratu – Lalthlamuana, Ratu
- New Vervek – P.C. Vanlalthlana, New Vervek
- Sakawrdai South – Lalrokima, Sakawrdai
- Sakawrdai North – H.C. Lalthanglura, Zohmun
- Zohmun – Upa Biakchungnunga, Zohmun
- Tinghmun – Upa Lalzoliana Zohmun
- Saipum – Lalmuanpuia Ngurte, Saipum
- Saiphai – Lalthlirlien Hmar, Saiphai
te an ni.
Nimina an hun hman hi Lalnunmawia Chuaungo, Sr. Vice President, MPCC chuan a kaihruai a, James Thanghmingmawia, Nomination Committee Member chuan Candidate te chanchin tlangpui sawina hun a nei a, RL Valla, Vice President chuan lawmthu sawina hun a nei bawk.