Kum 2007 hnu lam khan an thawm a reh tan kha a ni a, 2012 daih tawha an MV tihchhuah chhutzuina turin Blue Corn-in music video thar, ‘Luah Loh Zun’ an tichhuak dawn ta.
He hla hi Kimkimi phuah a ni a, kum thum vel kalta khan youtube-ah lyrics video anga dah niin, changkhat leh a thunawn chiah ngaihthlak theiha dah chu hla puitling pangngai ang tura phuah belh niin, an chul mam chho ta a ni.
Member kima music video an siam hnuhnun ber chu, ‘Min hlan ve ta che’ tih a ni a, 2012 kuma tihchhuah kha a ni nghe nghe.
Member pathum – Kimkim, Tlingi leh Felicia te awmna ‘Blue Corn’ hi kum 2004-2006 inkar khan Zo rimawi khawvela hmeichhe group lar ber, an tih ngam hial awm e.