Ninga zana UEFA Nations League khelhah team lian Italy leh Belgium an inhnehtawk. Italy leh Belgium an inhnehtawk laiin team lian France chuan Israel lakah hnehna an chang ve thung.
League A, Group 2 a hmahruaitu Italy hian Stadio Olimpico-ah Belgium team lian Belgium an mikhual a, an mualah bul an tan tha hle. Italy hian minute 24 chhung lekin goal hnih an thun hman a. An mualah awlsam takin an chak rinawm hman viau mah se kim lo zawkah an tan thuai vangin an dinhmun a phet a, uiawm takin an chak zo ta lo a ni.
Season tharah beisei anga bul tan tha lo Belgium lakah hian inkhel tan atanga minute khatna lekah Andrea Cambiaso chuan hmahruaina goal a thun nghal pang. Hma takah goal an thun vangin an phur viau a, an khel tha zui hle nghe nghe. Minute 24-na lekah Mateo Retegui chuan an goal hnihna a thun zui leh zat a, darkar chanve em pawh an khelh tlin hmain goal hnih an thun hman. Team lian Belgium lakah hnehna changin, an hmahruaina an tizau thei ngei tura ngaihna lian tak a awm hman.
Si hnih faia hma an hruai hnuin Italy an chesual a, minute 40-na lekah Lorenzo Pellegrini hnawhchhuah a ni. Tam zawk an nih vangin Belgium in huaisenna thar an nei a, na takin an khingpuite an nawr zui nghal. Tam zawk an nih atanga minute hnih hnu lekah Maxim De Cuyper chuan goal thunin an si phurh a sut then a, inkhel boruak a nung thar leh zual.
Chawlhlawk hnu lamah Belgium in an si phurh sut zawh ngei tumin tan an khawh a, Italy in an goal venhim tumin tan an khawh ve thung. Inkhel boruak nung tha takah Arsenal forward Leandro Trossard chuan minute 61-naa goal thunin an si phurh a sut zo. Goal hnih an ve ve an thun hnuin goal dang a luh belh thei tawh lova, team lian Italy leh Belgium te chu 2-2 in an inhnehtawk zui ta a ni. An mualah chak zo lo mah se Italy hian Group 2-ah hma an hruai chhunzawm zel tho thung.
- France an chak
Group 2-a inkhel dangah France chuan Bozsik Aréna, Hungary-a an khingpui Israel chu 4-1 in an hneh a, Italy nen an inkar an tizim.
France hian Israel lakah bul an tan tha a, inkhel tan atanga minute rukna lekah Eduardo Camavinga chuan hmahruaina goal a thun nghal. Hma takah goal chhuah nghal mah se Israel an buai mai lova, an si phurh an sut ve thuai. Minute 24-naah Omri Gandelman chuan goal thunin an si phurh a sut. Israel in an si phurh sut mah se France in a chhanglet leh thuai a, minute 28-naah Christopher Nkunku chuan hma an hruai nawn lehna goal a thun a, 2-1 a hmahruai chungin chawlhlawk an hmang.
Chawlhlawk hnu lamah France an khel tha chhunzawm a, goal hnih an thun belh leh. Second half ah goal lut a awm theih lawk loh hnuin hun tawp dawn hnaih minute 87-naah Matteo Guendouzi chuan France goal thumna a thun a. Guendouzi goal thun atanga minute hnih hnu lekah Bradley Barcola chuan an goal lina a thun zui leh zat a, an chakna a nemnghet.
League A, Group 2-ah a mi ten vawi thum theuh an khel ta a, tlawm la nei lo Italy chu hmahruaitu an ni. Italy hnuaiah hian vawi hnih chak a, vawi khat tlawm tawh France chu point ruk hmuin an awm a. Belgium in point li an hmu tawh a, Israel in point hmu an la nei ve lo thung.