Asia khawmual atanga World Cup 2026 khel tur zawnnaah Japan an khel tha a, an chak tluang zel. Grop C hmahruaitu Japan hian ningani zana an khingpui Saudi Arabia chu si hnih faiin an hneh.
Japan hi Saudi Arabia hmachhawn turin King Abdullah Sports City-ah an lenglut a, mikhual an nihna mualah an khel tha hle. Inkhel tan atanga minute 14-na lekah Daichi Kamada chuan hmahruaina goal a thun a. Hun tawp dawn hnaih minute 81-naah Koki Ogawa chuan an goal thun belh lehin an chakna a nem nghet a. Mimualah si hnih faia hnehna changin point thum an hmu.
Japan hian Group C-ah vawi thum khel tawhin an la chak vek a, point ngain hma an hruai fal mek. An hnuai chiaha awm Australia chuan ninga zana an khingpui China lakah si an phurh hmasak zet hnuin hnehna an chang let a, point thum an hmu. Group C table mawngphaha awm mek China tan hian Xie Wenneng chuan minute 20-na lekah hmahruaina goal thun mah se Australia tan hian Lewis Miller, Craig Goodwin leh Nishan Velupillay ten goal an thun. Australia hian point li an hmu mek a, China in point an la hmu ve lo thung a, table mawng an luah.