Wembley final ngei maia Manchester City hneha 2024 FA Cup trophy hawntu Manchester United chuan an title kawl lai humhim an tumna kawngah record siama vawi 14 champion tling Gunners an luhkhung dawn a, hei hi FA Cup third round-a inkhel ngaihven hlawh ber tur a ni ang.
Premier League hmahruaitu ni mek Liverpool chuan League Two Accrington Stanley an mikhual dawn a; nikum final-a chak zo ta lo City-in ‘Class of 92’ rual khatin an intawm Salford City an mikhual ve bawk ang.
Salford City neitute zingah hian Manchester United player hlui rualkhat – Gary Neville, Ryan Giggs, Phil Neville, Nicky Butt, Paul Scholes leh David Beckham an tel a; anniho hi Old Trafford club-a seilian leh Alex Ferguson-a hnuaia vulzaho kha niin, hminglema ‘Class of 92’ an tihte kha an ni a; football khelh an chawlhsan hnuah pawh club neitu nihna an changho leh ta zel a ni.
Kumin May thla final-a City hnehtu Old Trafford club hi FA Cup-ah vawi 13 champion tling ve tawhin, trophy la ngun ber Arsenal paltlanga kumin hian an title kawl lai an humhim thei a nih chuan north London club record ding lai an nihrualpui thei dawn a ni.
FA Cup third round draw tihchhuah taka non-league club pahnih la dam awmchhun zinga a pakhat zawk Tamworth chuan top flight club Tottenham Hotspurs an mikhual ang.
He tournament kal laia ranking hniam ber Tamworth hian Ange Postecoglou team Spurs hmachhawn thei turin penalty shootout-ah League One side Burton Albion an hneh a; anni ang bawka National League club dang Dagenham & Redbridge chuan team nem zawk tumin Championship Millwall an luhkhung dawn a ni.
Kum 39 mi ni tawh full-back Ashley Young-a khelhna Everton leh a fapa rawlthar kum 18 mi Tyler-a club vawn lai Peterborough an intum dawn avangin Toffees khelmualah pafa inhmachhawn hmuh tur a awm beisei ang!
Chu mi chungchang chu England international hlui Young hian X-ah tarlangin, a duhthusam leh mangphan thin chu a taka a chan mai theih thu a tarchhuak.
Draw dangah Chelsea chuan League Two lama a mawngphah luahtu club Morecambe an mikhual dawn a; fourth-tier lama talbuai mek Bromley pawhin Newcastle United khelmual St James’ Park-ah hna hautak thawh tur an nei ve dawn bawk a ni!
Third-round inkhel hi kum thar January ni 11, Inrinni atanga khelh tan tur a ni.
Tun tum third round draw hi Premier League leh Championship club 44-te inlan tanna tur niin, England rama league division sangber leh a dawttua khel club-te hian karhmasa lama second-round paltlang league hniam zawk leh non-league club 20-te an zawm dawn a ni.
- FA Cup third-round draw
Southampton v Swansea City
Arsenal v Manchester United
Exeter City v Oxford United
Leyton Orient v Derby County
Reading v Burnley
Aston Villa v West Ham
Norwich City v Brighton & Hove Albion
Manchester City v Salford
Millwall v Dagenham & Redbridge
Liverpool v Accrington Stanley
Bristol City v Wolverhampton Wanderers
Preston North End v Charlton Athletic
Chelsea v Morecambe
Middlesbrough v Blackburn Rovers
Bournemouth v West Bromwich Albion
Mansfield Town v Wigan Athletic
Tamworth v Tottenham
Hull City v Doncaster Rovers
Sunderland v Stoke City
Leicester City v Queens Park Rangers
Brentford v Plymouth Argyle
Coventry City v Sheffield Wednesday
Newcastle United v Bromley
Everton v Peterborough United
Wycombe Wanderers v Portsmouth
Birmingham City v Lincoln City
Leeds United v Harrogate Town
Nottingham Forest v Luton Town
Sheffield United v Cardiff City
Ipswich Town v Bristol Rovers
Fulham v Watford
Crystal Palace v Stockport County