December 3 hi khawvel pum huap ‘Rualbanlote Ni’ (International Day of Persons with Disabilities) a ni a. He ni denchhen hian Mizoram hmun hrang hrangah hun hman a ni.
Aizawlah chuan ‘Rualbanlote Ni’ pualin Canteen Kual atangin Zarkawt Recreation Centre thleng kawng zawh buatsaih a nih hnuah inkhawm buatsaih niin, Social Welfare Minister Lalrinpuii chuan khuallian niin a hmanpui.
He ni puala inkhawmah thusawiin minister chuan tun hma lamah Mizo khawtlangah ralbanlote en hniamna leh nawmnah taka chhawnchhaih a, nuihza siam nana hman te an ching nasa a. Hei hi ngaimawhin upaten ‘piansualin tlai luat a nei lo’ tiin an zilhhau thin tih a sawi.
Lalrinpuii chuan, pianphunga rualbanlote dinhmuna din chu duh lo vek mah ila, anmahni dikna leh chanvo lam erawh chuan ngaihthah hle ni hian a la hriat tih sawiin, “Tun hnuah sorkarin chak takin hma a la chho a, Persons with Disability Wing hnuaiah Commissioner te hial kan nei ta a, mipui dawr thin department te leh sorkar hmun pawimawh chi hrang hrangah pianphunga rualbanlote tan kawng awlsam ramp, signage leh a dangte a awm tha em tih vil rengin theihtawp an chhuah a, an hmalakna hian rah tha a chhuah mek zel a ni,” tiin, sorkar hnalak dawn reng rengin rualbanlote pualin 3% reservation nei theih a ni ta hial chu hmasawnna a nih thu a sawi.
Zarkawt Recreation Centre-ah hian inkhawm tawi buatsaih a nih hnuah, inclusive concert neih a ni. He hun ah hian rualbanloten music band, zai , lam leh skit te hmangin an thiam an pho lang a. He ni denchhen a Spastic Society of Mizoramin lucky ticket a siam pawh vawr a ni.
CM-in Rualbanlote Ni pualin chibai buk
Chief Minister Lalduhoma chuan khawvel puma Rualbanlote Ni (International Day for Persons With Disability) 2024 pualin chibai bukin, Mizoram sorkarin rualbanlote chu engtiklai mahin a thlahthlam ngai loh tur thu a sawi.
Chief minister hian a social media account pahnih – Instagram leh Facebook kaltlangin chibai bukna a tichhuakin, “Theihna danglam bik nei (differently abled) kan unaute, hmasawnna mil zela an theihna hai chhuahpui hi khawvelin a ngai pawimawh hle a. Kumin thupui pawh hi, ‘Amplifying the leadership of persons with disabilities for an inclusive and sustainable, future’ tih a ni. Kan theihna zawn theuhvah kan unaute hi khawngaihna mai ni lo va, hmangaihna nena an theihna hai chhuahpui tur leh huapzo zawk leh awmze nei zawka tanpui theuh turin mi tin ka sawm a ni,” tiin a tar lang.
Sorkar chuan zirna in tam takah rualbanlo naupangte tana chet awlsam zawkna tur hmanrua a siam tih tar lang bawkin Chief minister chuan, “Special educator te pawh mumal leh awmze nei zawka hman tangkai dan a dap mek. An tana hmalak theihna awm apiangah hma a la zel ang,” tiin, rualbanlo zawng zawng te, an tana serh hran, he niah hian, ‘Mi tichaktuah chuan engkim ka ti thei’ tih thu dik leh rinawm hi englai pawha vawng tlat tura chahin, Mizoram sorkarin engtiklai mahin a thlahthlam ngai loh tur thu hriatsak turin a chah bawk.