- Dr. C. Lalrampana
A KAMKÊUNA
Hla phuah thiam Pu Rokunga’n Mizoram nawmzia a hriattin “Kan Zotlang ram nuam hi chhawrpial rûn I iang e” tiin a thu tha si, a thluk duhthusama mawiin a lo phuah hi a van thain a van hlu tehlul êm! Pu Rokunga hian hla 20 vel chauh a phuah nain tunlai hla tualchher tak tak, hlathu pawh hmang mumal lem lova ttawngkam tluang pangngai a thluk siam ve satliah ang ringawt hi chu a ni lo deuh. A hlathute hian belh chian a dawlin a thlukte lah thinlai ril fan tak tak leh lung kuai tak tak vek a ni. Sikul naupang zirlaibuahte zir tlak thiau, ram leh hnama harhna thlentu, inpumkhatna leh inlungrualna, thinlunga ram hmangaihna rilru tuh thei, awmze nei tak tak vek a ni. Hman laia kan hla neih hmasak ber chu ‘Khawmhma pal a er an ti, A duh duhin er rawh se.” tih a ni e an ti. A hun lai kha chuan mittui tla zawih zawih khawpin an tuipui ve tho thin nia sawi a ni. Heta tang hian thu ringawt chuan hla tel lo chuan hringnun kalsiam a tifamkim thei lo a ni tih a tilang chiang hle. Tunlai thangtharte zinga hla phuah thiam tak takte pawh hi an hun lai zelah an hluin hnam ro tling vek an ni. Zai lamah phei chuan Mizote hi kan intodelh hneh hle a; engemaw puipun nikhua rêng rêngah pawh zaitthiam tak tak koh mai theih kan nei kur zut thin. Hnam dang zingah hetiang hi an vang hle. Abikin India rama hnam lian ber leh tam ber Hindu-ho zingah phei chuan talent nei tha bik tak an nih loh phei chuan zaithiam han koh mai tur hi an tam lovin an vang hle thin. Thu leh hla ngaina hnam kan nih avangin hnathawh pah leh ei rawngbawl paha nalh tak taka han zai thei mai lah hi kan tam hle bawk. Pathianin min vohbikna ropui tak niin a lang. Hetih rual erawh chuan thu leh hla lama kan intodelh ang hian ei leh bar economic-ah inodelh ila, Mizoram sawrkar supply department-in a siam family ration card rawng hrang hrangte hi lek pharh duai duai reng a ngai lo tur a! Chutiang khawp chuan intodelh thei ila phei chuan a van tha lehzual dawn tehlul em! Thiam tak leh changkang taka incheia dawhsana zai lam hnehsawh hle si, thlakhat chhung lek ei leh bar tur chhek khawlsa pawh nei leh thei si lo kan la nih hmel hle.
CHHAWRPIAL RÛN IANG ZORAM CHU?
Zohnahthlakte chanchin hlui chhuitu leh ziak chhawngtute chuan Mizote hi Burma ram chin Hills atangin kum zabi 16/17-na lai vel khan tuna kan chen mekna Zoram tlangram kham kar chhengchhe takah hian awmhmun kan khuar tan niin an sawi thin. Burma phaizawl nuam tak kalsanin Silchar Assam phaizawl leh Tripura phaizawl, Bangladesh phai zawl rai nuam takte thleng law law bawk si lovin kham kar khawkrawk, tlangram chhuk chho changkha ang maia chhim leh hmar zawnga tlang leh mual inkhawhtawn neknuk, satharte chauh tualchaina hmun tur niawm taka ngaih theihah hian hringnun damchhung chhir chhuah chatuan mai tur chu Zofate’n kan peih loh emaw, kan inchhir a hlauh vang zawk nge Pu Rokunga’n kan zoram hi chhawrpial rûn (in) ang maia a lo phuah le? Pu Rokunga hla phuah hi ngun taka thlir chuan kan Zoram hi khâm chhengchhe tak ni mah se, a boruak thlifim lênna leh fiara tui thiang luanna ram, nipui khawlum lai ber pawha lum lutuk lo, thlasik vawh lai ber pawha vawt lutuk lo, fur ruahtui lah a tawk chauha a tlakna ram kan nih avang hian chhawrpial rûn ang maia nuam niin a tarlang a ni. Thenkhat chuan Chhawrpial a tih hi chawrthlapui (moon) angah ngaiin vana thla eng nuam tak hmuna in nuam tak han saka han awm angah ngaiin zeldin thuin chhawrpial rûn hi an hrilhfiah thinnniin a lang. Athente erawhin chhawrpial chu a tak tak awm lo, thlarau leh ngaihruatnaa thlira tehkhinna satliah mai nia ngai lah bo lo. Mahse, sawidan thenkhatah chuan “Pu Rokunga hi a tleirawl laiin a pite khua Chhawrpial khuaah zinin nula tlangval leh inleng thenrual dangte nen hlim takin a pite inah chuan an awmho dar dar thin a, hemi in nuam taka an khawsakho lai chu Mizoram boruak nuam tak nen a hla thuah hian tehkhin nan a hmang zawk a ni” tite an awm bawk. Hman laiin Chhawrpial khua hi Dampa khawthlang lampangah khuan a awm thin a; chutah chuan Pu Rokunga pite hi an awm thin nia sawi a ni. Chhawrpial khua hi tunah chuan a awm tawh lova, mahse, chhawrpial tlang erawh chu a la awm reng a; Dampa rengpui (dampa sanctuary) atangin km 21.1-a hla niin West Phaileng paltlangin Marpara kawnga kal zelin minute 46 velah thlen theih a ni. A engapawh chu ni fahmiang, a dik leh dik loh hre turin amah Pu Rokunga ber hi a dam tawh si lova, inrinsiak vel mai mai lo chu tih theih a awm tawh lo. Tih theih tehchiam nei mah suh ila, a phuahtu hian kan zoram chhengchhe tak hi kham chhengchhia leh khawkrawk rualrem lo tak pawh ni mah se, a nawmzia a rawn hrilhfak a ni ve mai a; a hmunhma rem lovin chhengchhe hle mah se, Pathianin kan ram luah leh chenna atana a buatsaih leh ruahman hi ramdang aia a nawmna zawk tam tak a awm a ni tih hretute vek kan ni awm e. Pu Rokunga’n chhawrpial rûn (in) nuam tak a lo tehkhin chhan ber, boruak thiang nuam leh thlifim tleh heuh heuhna hmun, lum lutuk lo, vawt lutuk lo, a thlum a al eizaa lungrual taka “sem sem dam dam, ei bil thi thi” tia inngeih dial diala kan khawsakhona ram nuam tak hi a chhuanawm takzet a ni tih kan hriat thiam a pawimawh hle. Pu Rokunga’n kan zotlang ram nuam a tihna chhan chhuanawm tak pakhat chu Aizawl hian India ramah boruak thianghlim ber nihna a hauh mek a, India ram khawpui hrang hrang boruak thianghlim leh thianghlim loh tehnaah Air Quality Index (AQI) 29 niin a sang ber a ni mek a ni. Mizoram khawpui, Aizawl hi Inrinni 16.11.2024 khan boruak thianghlim ber nia chhinchhiah (record) a ni a, Assam-a Nagaon leh Kerala-a Thrissur-in a dawt a ni. A tawi zawngin Mizoram khawpui Aizawl-in AQI 29 a nih baka khawpui fai dangte chu Nagaon, Thrissur, Bangalkote-te an ni. Kum 50 hnuai lam AQI nei khawpuiah chuan boruak quality tha tak tak hip tur a la awm a ni. Delhi leh a chhehvela boruak thianghlim lo, mihring hriselna khawih chhe thei bak hip tur an muh zawh tawh loh laiin, keini chuan boruak thiang tak leh rimtui tak, zanpar rimtui thlenga hip luh tur kan la tlachham lo huli kan van vannei tehlul êm! Delhi khawpui boruak hi Air Quality Index (AQI) chuan hlauhawm chhinchhiahna chin chung lam ‘severe plus category’ a pel daih tawh niin a tarlang. Hetih lai hian India rama khawpui thenkhat chuan boruak thianghlim tak tak an la hip thei a. Mizoram khawpui ber Aizawl hi hmahruaitu, heng khawpui, AQI 50 hnuai lama la awma-‘good air quality’ tia dahhrante zingah boruak hrisel tak neiin pakhatna dunhmun kan la hauh a ni. November 19, Thawhlehni-a India rama khawpui fai ber berte leh boruak thianghlim neih dante chu hetiang hi a ni: Aizawl, Mizoram Air Quality Index (AQI) 29; Nagaon, Assam 38; Trissur, Kerala 43; Bangalkote, Karnataka 46; Naharlagun, Arunachal 48; Guwahati. Assam 48; Ramanathapuram, Tamilnadu 48; Chamarajanagar, Karnataka 50-te an ni. Tunah hian India ram khawpui ber New Delhi chu AQI 352 a ni a, boruak chhia, boruak bawlhhlawh leh hlauhawm ber dinhmunah a awm mek a ni. Hetih lai hian hal lote’n lungruala dar ang kan lênna, perkhuang tingtang zaia kan chawi lai kan Zoram nuam; parmawi thingtin vulna, hram thiam valeng tinreng sianglawina leh riahrun remna, chhemdam thlifim lenna kan zotlang ram nuam tak hi India ram puma boruak thianghlim tehfungah pakhatna dinhmun kan han dai thleng thei hi alawmawmin a ropui takzet a, Lalpa malsawm ram rim nam kan nih vang liau liau a ni tih I hre reng ang u.
A TLÂNGKAWMNA
Mizoram hi nuam hle mah se, a ram thleng awm danah erawh chhuan tur reng a awm lem lo. A lenzawng lah a dung mel 20, a vang mel 100, Sq km 21,087 (8,139 sq mel) Israel ram aia la te mah zawk a nih bakah kawng hrang hranga tehnaah dinhmun duhawm lo ber ber nihna natna khirhkhan leh tihbaiawm pui pui tamna, cancer tamna ber, HIV+ tamna ber, eiruk hluarna ber, ruihhlo leh smuggling tawlh ruk tamna ber, sawrkar hnathawk aikal la tamna ber, thih hnua sawrkar hnathawk aikal la thei awmna awm chhun, ralthuam hlauhawm tawlhruk tamna ber, nuthlawi tamna ber, sikserh vei tamna ber kan ni lehnghal a, hemi kawng thu ngaihtuah hi chuan kan dinhmun dai mek hi a chhuanawm lohvin a zahthlak takzet a ni. Mahse, hetih lai mek hian India ram state-a state ralmuang ber, state hlim ber, mirethei leh hausa inkhairualna ber pawl leh boruak thianghlim ber hip mektu kan han ni thei hi a ropuiin a chhuanawm takzet a ni. Russia & Ukrain indo; Israel & Hamas, Hizbullah; Houthi indo; Myanmar mipui & Sual Sipai indo; Manipur meitei & Zo-kuki-te indo buaina nasa tak leh indona hmun hrehawm tak ang mai hi kan tawng ve ang tih a van hlauhawm tehlul em! Hetiang buaina leh indona rapthlak hmachhawn ve lo tur hian theihtawp chhuahin state ralmuang ber kan nihna hi vawnghim hram hram ila a van tihzia dawn tehlul em! Remna leh muannate hi duh duha neih theih ngawt a ni lo. Chuvangin, remna hi a hlu ên êm a, remna leh muanna hlu tak; kan neih mek hi kan humhalha kan vawnhim tlat loh chuan buaina, indona leh manganna rapthlak tak hi kan hmachhawn ve reng thei a ni. Buaina kan tawh ve palh hlauh chuan chinfel leh mai theih a ni thin si lo. Tuna boruak zangkhai leh thianghlim ber hiptu kan nih theihna chhan pawh hi a nihna takah chuan thil siam chhuahna khawl (manufacturing machines, equipment facilities) chihrang hrang kan la neih tlem luat vang leh lirthei khu leng boruak tibawlhhlawh tham khawpa nasa kan la neih loh vang a ni ber a, chuvangin, chapo taka hawi pir thei ngawt kan ni chuang lo. Hma kan la sawn loh lutuk avanga thil siam chhuahna khawl ropui tak tak, meikhu siamchhuaktu kan la neih zawh ve loh vang leh neih tlem vang leh lirthei khu boruak tibawlhhlawh tham kan la neih ve loh vang a ni. Nakinah kan la changkang chho zel ang a, thing leh mau boruak tha siamtu kan suat tam chho zel ang a, thil chihrang hrang siam chhuahna khawl chihrang hrang kan ngah ve hunah leh lirthei khu ninawm tham khawpa tam kan neih hunah chuan India rama boruak thianghlim ber nihna hi kan hauh reng thei tawh bik lovang. Chuvangin, kan ramngawte hi humhalhin, tuihnate humhalh tha ila, kan in leh lo chuktuah huana thei kung, thingkung leh ramhmul hlobet ilo thleng hian humhalhin vawng thianghlimin duat takin enkawl reng ila; thilsiam chhuah khawl bun tur boruak thianghlim lo thlen tam theitu apiang fimkhur takin Aizawl khawpui pawn leh daifem lam bun zel theih ni bawk se. Tin, khawpui chhung kawtthler leh tuiluankawrte mumal taka siamin vawng thianghlim reng ila, bawlhhlawh paih tura infuihna hlathu chham slogan social media platform hrang hrang kaltlanga puan chhuah dum dum reng ngai tawh lo khawpin faina leh thianghlimnate hi thinlung thianghlimna nen a takin nunpui theuh ila kan zotlang ram nuam hi chhawrpial khuaa Pu Rokunga pite in aia nuam, ‘Copenhagen, Denmark’ khawvela khawpui fai ber leh thianghlim ber ai pawha nuam leh fai thianghlim zawk hi kan nei thei ngei ang.