Aizawl: Chief Secretary Khilli Ram Meena chuan Inrinni khan Champhai district-a raltlante dahkhawmna hmun pahnih Champhai Zote ITI Camp leh Zokhawthara Bethel Camp a tlawh bakah Indo-Myanmar ramri a tlawh.
Chief secretary hi Champhai Bawrhsap VL Remliana, Addl SP PC Laltanpuia, sorkar official dang te leh Champhai Sub Hqrs YMA hruaitu ten an tawiawm.
Sorkar hotute leh tlawmngai pawl hruaitute hian chief secretary hnenah hian raltlan enkawlna kawnga an hmalakna hrang hrang leh harsatna an tawhte an hrilhfiah a. Champhai Zote ITI Camp-a awm mekte chu Sub-Headquarters YMA ruahmanna angin Champhai Zion Vengah sawn tum mek an nih thu an lo hrilh bawk.
Chief secretary hian raltlan zinga an hruaitute pawh a kawm a. An harsatna leh an dinhmunte a zawtfiah a ni.
Champhai Zote ITI Camp-ah hian tun dinhmunah raltlan mi 317 (puitling mipa 169, hmeichhia 62 leh naupang 86) an awm mek a. Bethel Camp, Zokhawtharah hian mi 399 (puitling mipa 110, hmeichhia 177 leh naupang 112) an awm mek a ni.