Aizawl: DoNER Ministry-in hmarchhak puala intawhkhawmna a buatsaih, Ashtalakshmi Mahotsav-ah Mizoram sorkar aiawhin Sports Minister Lalnghinglova Hmar a tel.
Intawhkhawmnah hi Zirtawpni khan Prime Minister Narendra Modi chuan New Delhi-ah a hawng a. Hawnna inkhawmah DoNER Minister Jyotiraditya Scindia bakah hmarchhak state-a chief minister-te an tel a, Lalnghinglova Hmar hi Mizoram Chief Minister Lalduhoma aiawhin a tel thung.
December 6-8 chhung neih Ashtalakshmi Mahotsav-ah hian hmarchhak state pariat atangin an thlai, pangpar leh thei thar chhuah hrang hrang leh kutthemthiamna hmanga an thil siamte pho chhuah a ni a, mi thiamte subject hrang hranga an inrawnkhawmna hun buatsaih a nih bakah zai, lâm, lemchan, fashion show leh hmarchhak pholanna tur thil chi hrang hrang entir a ni.
Ashtalakshmi Mahotsav-ah hian Mizoram sorkar aiawhtu, Sports Minister Lalnghinglova Hmar chuan Mizoram leh hmarchhak state-te hmasawnna tur hrang hrang sawiin sports chungchang bikah Khelo India Scheme kaltlanga sum hmuh thin chuan hmarchhak state mipui, sports ngaina tak takte mamawh a phuhru zo meuh lo tih a sawi.
Prime Minister Modi kaihhruaina hnuaiah India-in Olympic 2036 thlen a dilah sports infrastructure ropui leh changkang tak tak a din thei ngei mah se, chung infrastructure-ah te chuan tunge inel dawn, tih an inzawh a ngai. India tan Olympics thlen chu zahthlaka a chan loh nan tun atangin hma an lak nghal char char a tul tawh tih sawiin, hmasawnna tura rawtna a neihte Lalnghinglova Hmar hian a thlen.
Sports Minister chuan India hmarchhakah sports talent a awm a, mumal taka investment kalpui a nih phawt chuan Olympics 2036-a India hlawhtlinna kawng sialtu pawimawh tak a ni thei dawn tih a sawi a. North East-a sports hmasawn zel nan Ministry of DoNER-in state-te special status dilsak thei se a duh thu a sawi bawk.