Aizawl: PWD Minister Vanlalhlana chuan Sihhmuia Tlawng lei dawh mek avanga hun eng emaw chen kawng khar a ngai chu pawi a tih thu sawiin, hun reilo te chhung dawh hram hram turin mipui a ngen a. Ruahman anga hna kalpui a nih chuan tun kar chhung hian lei hi dawh kai hman beisei a nih thu a sawi.
Lengpui panna kawnga Sihhmuia Tlawng lei rem khawm tawh, dawh kai tur enchhinna ‘trial run’ chu Inrinni khan neih tan niin, PWD minister hian a enpui a. Lei dawh mek hi khawvel thiamna changkang tak hmanga lei remkhawm leh dawh hna hi kalpui a nih avangin hun eng emaw chen kawng khar a ngai chu pawi a tih thu a sawi a. Inkalpawhna tha leh rintlak zawk neih theih nan kawng zawhtu mipuite chu hun rei lote chhung lo la dawh hram hram turin a ngen.
Vanlalhlana hian ruahman anga hna kalpui a nih chuan tun kar chhung hian dawh kai hman beisei a nih thu sawiin dawh kai atanga ni 120 chhungin lirthei eng chi pawhin a zawh theih tura hawn hman tum a nih thu a sawi bawk.
Chief Engineer Zoramliana sawi danin Tlawng lei thar tur hi ton 450 vela rit niin metre 90-a thui a ni a, 70R loading class a ni a. Lei hi hrui hmanga khai a ni dawn a, minute khatah centimetre 30 zelin pawh phei a ni ang a, darkar 6 atanga darkar 8 chhunga pawh kai hman beisei a ni.
Tlawng lei hi ‘Network Inclined Arch Bridge’ a ni a, Poddar Infratech Pvt. Ltd., Delhi ten hna hi March 27, 2021 atang khan an thawk tan a. Project kalpuina atan hian MoRTH atangin Rs. 36.99 Crore ruahman a ni a. Lei thar hlan fel a nih hunah kawng hi lei hlui lam motor zawh theiha hawn theih beisei a nih thu thawktute chuan an sawi.