Aizawl: Kumin January leh December 9 inkarah Mizoramah TB vei mi 2,164 hmuhchhuah an ni.
Nimin khan TB campaign rûnpui – 100 Days Campaign kalpuina tur chu Supply Minister B Lalchhanzova’n Directorate of Hospital & Medical Education Auditorium, MINECO Khatla-ah a hawng.
Hawnna inkhawmah TB programme performance tar lan danin kumin January atanga December 9 thleng khan TB rinhlelh mi 24,017 test zingah a vei mi 2,164 hmuhchhuah niin inenkawl lai mi 147 an thi a. A vei tihdam zat chu zaa 80 a ni.
TB campaign rûnpui hawngtu, supply minister chuan 100 days campaign a hlawhtlin theihna tur chuan sorkar department-te bakah kohhran, tlawmngai pawl leh khawtlangte nena tanrual a pawimawh tak zet thu a sawi a. “Mizoram chu ram ralmuang tak ni mah se, hriselna kawngah erawh kan him loh thu leh ralmuang taka awm mai mai thei kan ni lo,” a ti.
He hun hi Sangchhin Chinzah, Secretary, H&FW Department chuan a kaihruai a. Dr. Vanlalsawma, Principal Director, H&FW Department chuan TB natna vei mi 150 chhawmdawl mektu North Eastern Development Finance Corporation Ltd. (NEDFi), B. Lalchhanzova leh Sangchhin Chinzah te hnenah certificate a hlan.
100 Days Campaign hawnna hun hi state level bakah Aizawl, Champhai, Mamit leh Serchhip district-ah te pawh neih vek tura ruahmanna siam a ni.