Mizo Hnam Rum chhung inkawm nimina neihah Leader of Opposition, Lalchhandama Ralte chuan, “Kuthnathawktu thawkrim tak takte thawhrah ang ang hi sorkar hian a intiam ang ngeiin leisak rawh se,” tia sawiin, January atanga May chhung chauh thlaite lei an tum leh si chu kuthnathawktute hmuhsitna a nih thu a sawi.
MNF vice president ni bawk, Lalchhandama Ralte chuan India sorkarin thlai thlan bik 24-ah kumtluana support price a pe ang hian hun rei lote chauh hawng lovin kumtluanin support price pe ve se a duh thu a sawi a. “An intiam ang ngeiin thlai hmarcha, sawhthing, aieng leh hmunphiah hi lei rawh se. Eng eng emaw dan phuah kual phuah kual lo hian kuthnathawktute tharchhuah ang ang hi a leina tur rate an sawi ang hian leisak rawh se,” a ti.
Tunah lo neituten thlai an thar tan a, Krismas thawmhnaw lei nan te, kohhran thawhlawm atante loneitute hian Krismas hma ngeia hman an duh tih sawiin Lalchhandama Ralte chuan, “An mamawh em em a ni. Chutiang a nih laia kum thar lam daiha lei an tum hi a dik lo,” a ti a. “Tin, transport subsidy siam si lova collection center tlem azawng chauha thlai thar lei an tum hi a dik lo a. Thingtlang khaw tinah sorkar hian lei rawh se,” a ti bawk.
ZPM sorkar hian hralh tur an zawng nasa hle tih sawiin Leader of Opposition chuan, “An sorkar phatah ZMC leh airport hralh an sawi a, small hydel project zawng zawng hralh an tum a, Chaltlang Tourist lodge hralh an tum bawk a,” tia sawiin, Laldenga leh Zoramthanga te vei em em, Congress-in kut an thlak nasat, Lengpui Airport hralh an tum ngar ngar hi ngaihtuah nawn turin a ngen tih a sawi a. AR leh sipai dangin hmun tha tak tak an luahte umchhuah an tum mek laia an kuta Zofate rohlu hlan an tum hi rem an tih loh thu sawiin, MNF chu na zawka che tura an inpeih thu a sawi.
MNF vice president chuan, “Politics-a phuba lak nan MSSSB an thiat a, MPSC kan thuam tha ang, an ti a. An thuam tha ta em? MPSC-ah hian sorkar a inrawlh thuk lutuk nge an hming hliau nasa ta hle a. Kum tira Entomologiest an lak tura kum tira short list siam tawh chu an cancel leh vek a. Screening an ti tha leh a, mi thar a rawn lut nawlh a, a tling ta a. Chu mai bakah Vety Asst. Surgeon lak tur result a chhuak a. Exam lo panga an tling a ni. Tun hnaiah buai chuar a tam hle,” tiin, MPSC hming hliau ta hi a pawi an tih thu leh sorkar hian MPSC rintlak a din leh theih nan hma la se a duh tih a sawi bawk.
Leisak turin kan inbuatsaih mek – Agri. minister
AZL: Nimina ZPM party-in an party pisaa chhung inkhawm an neihah thusawiin Agriculture Minister PC Vanlalruata chuan, campaign laia an lo aupui tawh angin thlai thar lei turin Chief Minister Lalduhoma kaihhruai ZPM ministry chu a inbuatsaih mek a, mipuite tihbeidawn an tum lo tih a sawi.
State Marketing Board chairman ni bawk, PC Vanlalruata chuan ZPM party chuan campaign lai atangin thlai thar lei chungchang an lo aupui tawh thin a, an lo aupui tawh ang ngeiin tunah hian thlai pali – sawhthing, aieng, hmarcha leh hmunphiah te lei turin marketing board an din chuan chak takin hma a la mek tih a sawi.
Tun hnaia International Conclave cum Buyer Seller Meet an buatsaihah India ram bakah ram hrang hrang atangin thlai thar ngaihventu an lo pung khawng tih sawiin, “Pathian zarah kan hma lakna a kal tluang hle a ni. Hetiang a nih mek lai hian mi thenkhat chuan thlai thar hi lei thei lo ila, mualpho takin sorkar hi awm se an duh emaw tih mai turin min châng reng a; nimahsela, Pu Lalduhoma kaihruai ZPM Ministry hian thlai thar hi kan lei ngei dawn a, mipuite tihbeidawn kan tum lo,” a ti.
PC Vanlalruata chuan district tinah Agriculture Marketing Committee an din tawh bakah khaw tinah society 800 dawn an din tawh tih a sawi a. Sawhthing leh aieng hi Jan-May thla thleng sorkarin a buaipui dawn a, hmunphiah leh hmarcha bikah January- March thla chhung sorkarin a market a buaipui bawk dawn tih a sawi a. Khaw tina society an dinte hi Primary Collection Centre-ah puan an ni dawn a, sorkar buaipui ngai kher lova anmahnia auction an lo tih ve theih chuan sorkar inrawlh kher ngai lovin anmahni society-in an hralh dawn a, sorkar rate anga leisaktu an hmuh loh erawh chuan secondary collection khaw 45 an puan tawhah an hralh mai dawn niin a sawi bawk.