- George L. Ralte, Vaivakawn
Krismas hi a awmzia ni a an sawi chu Isua lo pianni niin kum tinin Mizoram bik ah chuan tun thlengin pawltlak thla apiangin Krismas hi kan hmang ziah a ni.Hun hmasa lama kan Mizo Kristian hmasa te khan he Krismas ni hi ngai hluin lawmni ni bik a ni an ti a, hemi ni hi chuan awmni an kham thin a ni awm e.Khawvel a lo changkang zel a,tun hnu a kan rama kan sawrkar te hi chu Kristian sawrkar a nih avang te pawh a ni ve ang he pawltlak thla ni sawmhnih panga hi sawrkar pawh hian awmni a kham thin a ni.Kan Lal Isua pian champha ni hi chuan sawrkar pawhin hnathawktu zawng zawng te Kristian emaw Kristian lo pawh an hna chawlh tir vek thin a ni.Krismas kan mi hmasa ten an lo hman dan hi ruai theh emaw infiamna chi tin reng te siamin kan Zosap te leh hemi hun lai a sawrkar khan hemi ni lawmna atan hian an thil thawhlawm atangin sebawng leh vawk an lo ser te an lo lei thin a ni awm e.
Ni 25.12.1904 atang khan Mizoram ah hian Krismas hi sap ho an lo awm ve avangin a lo awm tan a, ni 23.12.1904 khan chhim lama zosap pahnih te pawh an nupui te ve ve nen Aizawl lamah lo pheiin,zosap sikul a naupang te leh sapho te pawhin pawisa thawh khawmin cheng sawmnga thawh khawmin vawk pathum leh thil dang leiin ni 27.12.1904 ah ruai te thehin hemi ni a tlai lam ni tlak dawnin zosap sikul ah an inkhawm a, chhim lam zosap pahnih te chuan Mizorama an rawn kal hmasak thu te, lawmthu sawina te, leh an chanchin te sawina neiin,hemi hnu hian bawrhsap in ah sapho chuan Pathian thu te ngai thlain inkhawmna neiin sap mipa pakua,sap hmeichhia paruk niin Mizo sawm pakhat,khasi pasarih, leh bengali pathum an tel a, sap te chuan hla te sain, sap upa zawkin thusawina te neiin, Isua a lo pian tirh ata a thih thlengin a sawi an ti.
Zan lam a lo nih chuan sapho chu bawrhsap in ah inkhawmna hun an hmang leh a, in chhung ah chuan far kumg te chawpin an phun a, a zar zawng zawng ah chuan khawnvar mawi tak tak te khai thluahin,hemi bul ah hian sapho mi sawm panga chuan nasa takin hla te sain, mawi an tih em avangin bawrhsap chuan a chaw ei dawhkan ah khasi ho thingpui a in tir a, dar sava ennawm te an siam a, dar zaiin an chaih a, hmuhnawm an ti hle a ni awm e.
Pawltlak thla ni sawmhnih paruk, ni sawmhnih pasarih, leh ni sawmhnih pariat chhung zawngin zosap sikul ah chuan Pathian thusawi leh ngaih thlakna hun te neiin lehkha zir lam pawh chawlhsan rihin, pawltlak thla ni sawmhnih pakua zan ah chuan sikul ah sapho chuan inkhawmna neiin babu ho bak ah Mizo a duh apiang telin bawrhsap chuan tumah chapo suh u tiin kal khawm mipui te chu zilhin, sap leh khasi hmeichhia pahnih te pawh an zai ve a ni.Mizote chu pawl li ah in siamin hla an in sak siak a,chhinga zirtirtu pawl te chu zai thiam ber ah thlan niin lawm man hlan niin an hla sakna hmun dawhkan ah puan sen te phahin a zai piang te an va ding chhuak a, thlirtu leh ngai thlatu mipui pawh an tam viau a ni awm e. Pawltlak thla ni sawmthum ah chuan sapho chu hmun dang ah an kal a, ruai te theh lehin pawlkut thla ni hnih ah chuan chhim lama sapho te pawh chu haw pheiin kum 1905 khan Zosapthara hovin Synod Press awmna hmunah hian Krismas an hman chungchang ripawt hlui thenkhat atangin a lang thei niin tarlan a ni.