Aizawl: UD&PA Minister K. Sapdanga chuan nimin khan in sak tanpuina (PMAY – Housing For All) dawng zinga sorkar laipuiin Mizoram atanga titha zual a thlan mi pathumte hnenah – PMAY-U Award a hlan.
UD&PA Directorate Meeting Room-ah K Sapdanga hian Lalmuanpuii, Champhai; Vansangliana, Mamit leh Lalramngheta, Kolasib te hnenah award a hlan a ni.
K Sapdanga chuan lawmman dawngtute chu lawmman lak phu, mi entawntlak an nih thu a sawi a. An kutchhuak a hmuh atangin rilru dik tak pu a kutchhuak chhuanawm tak an nei chu mi ropui tak tak thenkhatin an tluk loh a nih thu a sawi.
Sorkarin chhawmdawlna a ruahman hrang hrangte dik taka hman chuan rah tha leh hlawkthlak a chhuah thin thu a sawi a. Tangkai zawk emaw, tha zawka ngai a, ruahman loh anga tanpuina/chhawmdawlna hmang sual te hi a tawpah a pawi thin thu a sawi.
Lalmalsawma Pachuau, Secretary, UD&PA kaihhruai award hlanna inkhawmah Jacob Lalawmpuia, Director & Mission Director-PMAY chuan chhawmdawlna hi installment a pek a nih avangin beneficiary lamin an tih tur chin a hun taka an lo tih thin loh avangin installment dang an dawn belh theih loh phah thin thu a sawi.