Aizawl: Chief Minister Lalduhoma chuan bana kaih (hand holding) policy hmangin mipui rilru puthmang siam that an tum mek tih a sawi.
ZPM Zonu General Headquarters-in nimin khan Ransam CK Resort-ah advance Christmas an hmang a. Hmanpuitu, chief minister chuan, “Hun rei tak chhung sem policy hmangin kan ram hi kaihhruai a lo ni tawh thin a, chu chuan kawng tam takin mipuite rilru puthmang a dik lo zawngin a hruai nasa hle a ni, sem policy khan mi tam tak kutdawh rilru a puttir a, chu chuan kan ram mipuite hmasawnna tur a tithuanawp nasa hle a ni,” tiin, kalphung thar, mipui sorkarah erawh chuan sem policy ni lovin, thawhrimna an zuar a, bana kaih (hand holding) policy hmangin mipui rilru puthmang siam that an tum mek thu a sawi.
Bana kaih policy hnuaiah entrepreneurship hand holding, chief minister special pakage leh thlai thar lei kalpuiin hma an la mek tih sawiin chief minister chuan, “Hengte hi ruahmana felfai tak leh kalphung mumal tak hnuaiah lo chuan thil tih theih a ni lo va, thlai thar lei chungchanga ruahmanna kan siamte pawh mipuiten lo ngaihven a, thawhrim rah duhawm tak seng turin kuthnathawktute duhsakna kan hlan a ni,” a ti.
Chief minister chuan ZPM party chu party naupang tê ni mah se, opposition nih lai atang tawhin beih rawn an hlawh hle a. Sorkarna an chan hnuah pawh thu dik tawk lo hmanga beih chhunzawm an la ni reng a, mipui tana thu dik hriat hleih theih loh khawpin beihna an tawk fo a. Anmahni beituten dawt pawh an hman hreh loh avangin thu dik puan chhuah kawngah tan an lak a tul thu a sawi.
Lalduhoma chuan kalphung thar, mipui sorkar a lo pian theih nan Zonute hian tha an thawh hnem hlea a hriat thu a sawi bawk.
He hun hi R. Lalawmpuii, President Zonu Gen. Hqrs in a kaihruai a ni.