Kan ramah hian leilung hausakna hi kan beisei a chau hle niin a lang a. Kan politician ten kan ram hi oil lipui chungah a lang ani han ti thin mahse a tak ram hmuh tur awm mai dawnin a lang lova. A lo awm anih pawhin tunah rih chuan El dorado an sawi ang velah a ngaih theih ang. Pathianin min pek ramah hian kan damkhawchhuah a ngai a. Leihnuai hausakna hi siamtu hian mi zawng zawng tan a ruahman kher lova. Politiciante hmuiah bak chuan beisei tur a awm lo tih hi mipui hian chian viau a ngai.
Siamtu hian ram tin hi a chenga te azira hman tangkai theih vek tura a ruahman a ni a. Engmah chin theih lohna hmun thlaler ram hnuaiah te oil te a dah a. Keini erawh chu thlai engkim mai chin theihna ram boruak nuam tak min pe a. Min pek ang hi kan hman tangkai thiam a, kan neih ang ang kan humhalh thiam chuan he ram hi dinchhuahna tham a ni. Kan hman tangkai rualin kan ramah hian inthlah pung a, thangthar lo la awm lehzel turte tan kan humhalh thiam a ngai bawk.
Ram changkang apiangin an ram leilung humhalh nachang an hria a. Hun lokal leh tur atan khek nachang an hria a ni. Kan ei leh in mamawh atana ram ka hman tangkai reng reng hi hun lokal lehzel tur ngaihtuah chunga hman a ngai.
Kan ram awmna a kilkhawr avangin kan thlai tharte hralh mai a har thin a. A hralh theih awmchhun nia kan hriat sawhthing kan han ching vak a. Sawhthing kan chin hian eng angin nge kan ram a tihchhiat tih hi ngaihtuah tham a ni. Kan ching lo thei lo tih chu hriat sa mah nise kan sawhthing chin dan, ram kan suasam dan hi fimkhur ila. A hriate sawi danin sawhthing hi hmun khatah hian a rei berah kum 3 bak a chin theih loh an ti a. Chuti anih chuan mihring kan pung zelin ram kan bawh zau a ngai tial tial a. Kan ram thlai chin theihna hi reiloteah thlai chinna tlak lohin a chhuak thei a ni. Kan sawhthing chin danah hian a hmun chu kumhluna sawhthing chin nan a kan buatsaih a ngai. Mi ramah pawh an ching a. Leitha nen an chinna ngaiah kum tam tak an ching thei a. Hemi system ah hian kan luh ve vat loh chuan reiloteah kan ram kan tichhe vek ang a. Tlangram chhengchhe tak eizawnna engmah tih hleih theih lohna hmunah kan siam ngei ang. Ram ren thiam zawnga eizawn hi i tum hram hram ang u.