Aizawl: Assam Rifles Mandir bula hmeichhe kutdawh pakhat chu Women & Child Development department leh Vanramchhuangi (Ruatfela Nu) ruahmannain Department of Women & Child Development (WCD) Govt of Mizoram hnuaia hmeichhe baihvaite enkawlna, ‘Shakti Sadan,’ Tlangnuam, Aizawlah Inrinni khan dah luh a ni.
Social Activist Vanramchhuangi chuan home-a an dah luh hi hmeichhe kutdawh hi a taksa lan dan atangin a dam lo nasa hle tih sawiin, “Kha hmeichhe kutdawt kha motor chuang chunga han hmuh thuak pawhin a damlo nasa tih a hriat theih a, thlasik khawvawt takah lo thi khawng reng se, he Kristian ram leh he hnam mualphona a nih vangin WCD director ruahman puinain Shakti Sadan-ah kan dah phawt a ni. Hei hi a chhungte nge kutdawh tura chhawrtute lo hriat atan kan han puangzar a ni,” a ti.
Kutdawh hmeichhia hian a buaipuitute bula a sawi danin, kutdawh tur hian zingah taxi-in an dah a, tlaiah taxi bawkin an hruai leh thin tih sawiin, “Hei hi kutdawh dan tenawm ber pawl a ni. A taksa chhiatzia chu vunin a tuam a ni mai. A taksa chak lo lutukte han enkawl dam phawt se, khati anga damlo nasa kutdawh tirtute a zawn chhuah theih ang chu,” Ruatfela Nu chuan a ti bawk.