Aizawl: Lungleiah ruihhlo do kawnga hmalak dan tur an sawi hoa thutkhawmah Excise Minister Lalnghinglova Hmar chuan sorkarin ruihhlo do a ngaih pawimawh avangin Excise & Narcotice Department (END) pawh a thuam chak mek thu a sawi.
Lunglei DC Conference Hall-a thutkhawmah hian excise minister chuan Mizorama ruihhlo hluar zel chu engtin nge tangrualin an do ang tih ngaihtuah turin thut khawm chu buatsaih a nih thu sawiin, kohhran, NGO leh sorkar tan hona chuan awmzia a nei ngei dawn tih a sawi a. Sorkar, NGO, kohhran leh khawtlangin mahni hma zawnah an thiam dan danin ruihhlo chu an do theuh va, sawt zawka an do theih nan an hma lakna inhriat tawnpui a tul tih a sawi,
Sorkar chuan NGO leh kohhrante nen awmze nei zawka thawh ho zel dan tur a ngai pawimawh tih sawiin Lalnghinglova Hmar chuan, “Ruihhlo chu kan beih loh chuan kan tlawm tawh tihna a ni a, kan do loh chuan min hneh dawn a. Ram chhanna thil a nih avangin tih tak taka beih a ngai a ni,” a ti.
Sorkarin ruihhlo do a ngaih pawimawh avangin END pawh a thuam chak mek tih sawiin Excise Minister chuan, Saitual, Khawzawl leh Hnahthialah te Excise Station thar hawn a nih thu te, lirthei 18 (ke li nei 14 leh ke hnih nei pali) lei belh tura ruahman a nih thu leh thawktu sub-inspector pasarih lak tawh bakah, inspector, SI, ASI leh constable te lak belh tura ruahmanna a awm thu a sawi.
Lunglei District Bawrhsap Navneet Mann kaihruai thutkhawmah hian END Commissioner Z. Lalhmangaiha leh Lunglei District SP J. Lalmuankima te bakah, Lunglei Municipal Council (LMC) Councillor te, District Education Officer te, Lunglei Sub-Headquarters YMA hruaitute, kohhran hrang hrang aiawhte leh MJA te’n an hmalakna an sawi bakah an ngaih pawimawh dangte an sawi bawk.
He hunah hian Excise Minister Lalnghinglova Hmar chuan YMA Lunglei Sub-Headquarters Anti-Drug Squad (SADS) te hnenah ruihhlo dona kawnga an hma lakna atan Rs 10,000 a hlan nghal bawk.