Aizawl: Chakma Autonomous District Council (CADC)-a MNF MDC panga chu ZPM President Lalliansawta’n an party-ah Inrinni khan a lawm lut a. ZPM hian CADC-ah sorkar an siam theih thu vawiin hian Larsap Dr Hari Babu Kambhampati hnenah thlen an tum.
ZPM party pisaa lawm luh inkhawmah thu sawiin ZPM president chuan ZPM chu state sorkara thuneihna changtu ni mah se kalphung thar, mipui sorkar din tumtu an nih angin Autonomous District Council (ADC)-ah party dang sorkart thiah tumin sorkar chakna nen hmalakna a nei ngai lo a. Hetih rual hian, anmahni duhthu ngeia ZPM zawmte erawh lawm takin an lo pawm tih a sawi.
ZPM president chuan tunah hian CADC-ah ZPM-in MDC ngah ber party a lo ni tak avangin sorkarna siam tumin MDC 10-te hian Thawhtanni hian larsap hmuh an tum tih a sawi.
District Council & Minority Affairs Minister Lalsawivunga pawhin CADC-a MDC pangaten anmahni duhthlanna ngeia ZPM party an zawm chu lawmawm a tih thu leh, Mizoram tan mai bakah CADC mipuite tan hmasawnna tluantling thlentu ni turin duhsakna a hlan.
Tar lan tawh angin CADC-a MNF kaihhruai sorkar chu chawlhkar kalta Nilaini khan no confidence motion hmangin paih a ni a, sorkar a tluk hnu hian MNF MDC pariatin BJP an zawm a, mi dang pangain ZPM an zawm thung. Heti hian ZPM-in MDC 10 neiin an ngah ber a, BJP-in pakua neiin MNF-in MDC pakhat an nei.