Inrinni khan Falkland khawtlang chuan an pawisa thawhkhawm hmangin an vengchhung kawngchhia siam hnatlang an nei a, an fakawm hle.
An veng hruaitute sawi danin mi inphalte hnen atangin thawhlawm an dawng reng a, kawng an siam hnu pawh hian an la dawn belh reng thu an sawi a, kawngpui tha zawk an neih zel pawh beisei ang.
Kan hriat angin kan ram kawng hrim hrim hi a chhiat hian ngaihsak loh a hlawh thei viau mai a, mipui phun luai luai hnu hi nghah a ni thin nimai hian a hriat a ni.
Tuna kawngpui siamthatu Falkland khawtlang pawh hian an veng chhung kawngpui chu kawngpui pawimawh tak a nih avangin siamthat turin thuneitute hnenah an lo thlen tawh thin a, a bik takin an kawngpui phei hi chu motor lian zualte kalkawng ber a nih avangin ngaihsak pawh an phu hle.
Sorkar hian a tih tur a ti lo nge vawiin thlengin siamthat leh enkawl hlawh lo kawng a ni chho ta reng mai hi hriatthiam a har hle in a rinawm a, khawtlang thawhchhuah a ngai ta hial hi inenfiah nan hmang se, kawngpui tha lo lai siam zung zung hna hi sorkar hian ngaihpawimawhah nei thin tawh se a lawmawm ngawt ang.
Kawngpui a that hi chuan engkim tih a awlsam a, hmasawnna hnathawh pawh a kal chak nge nge thin tih kan hre vek awm e, chuti a ni chunga kan kawngpui, a bik takin khawpui chhung kawngpui a la chhe em em reng mai hi ngaihtuahna senga thapui thawh chunga hmalak ran a ngai e.