Aizawl: Mizorama rubber chin theihna hmun zawng zawnga rubber chin vekna tur, Chief Minister’s Rubber Missions chu nimin khan Dawrpui Multipurpose Hall-ah Chief Minister Lalduhoma’n hawngin, “Thlai tam tak kan lo ching thlawn tawh thin a, rubber hi chu kan ching thlawn lo ang,” a ti.
Chief minister hian tun hmain loneitute hnenah thlai chin tur kawhhmun thin mah se, thlai kawhhmuh kha a lo fuh tawk loh fo avang an beidawng thin tih a sawi a. Hmalakna tam tak an lo kalpui tawh thin na a, tunah hian ram hi han en ila, hmun zau tak tak hi a la awl duai mai tih sawiin, “Heng ram ruak, rubber chin theihna hmunah hian khuarei daih, a hralhna lama harsatna awm ve ngai lo rubber hi ching vek mai ila, a ching duh apiang chu chintir bawk ila. Kan la thatpui tur a ni. Thlai tam tak kan lo ching thlawn tawh thin a, rubber hi chu kan ching thlawn lo vang,” a ti.
Vawiina Mizorama kuthnathawktu tui tak takho hi kum upa tawh lam te, pensioner-te an ni fur mai a. Thalaiten kuthnathawh hi rawn tui se, thapui thawhin rawn bei se an duh tih a sawi bawk.
A hawnna inkhawmah hian Mission bultanna tur RIDF XXX atanga Rs. 27.98 crore sanction-na lehkha chu chief minister hnenah hian Pankaja Borah, GM, NABARD, Regional Office, Mizoram, chuan a hlan a. He sum hmang hian district pasarihah zau 24-ah bul tan tur a ni.
- Mission kalphung turte
- Mission hian Governing Board a nei ang a, thuneitu sang ber a ni ang. A hnuaiah Steering Committee a awm leh ang a, anni kaihhruaina hnuaiah hian Nodal Department Land Resources, Soil & Water Conservation chuan district tina DC te nena thawk hovin hna an thawk dawn.
- Fund hi NEC, NABARD, EAP, Ministry of Minority Affairs, CSR te leh a remchang apiang an dap ang. Kum tin hectare 1000 zel target siamin chhungkaw 1000 zel an tuam ang a, kum 2025-26 financial year atanga bul tanin kum li (4) chhung atan an kalpui phawt ang. An hmalakna chu zau (cluster) ang zela kalpui tur a ni.
- Mizoram hian rubber chin theihna ram hectares 37,000 aia zau hret a nei a, hectare 6,700 velah chin tawh niin, chin tawh zawng zawng hmun thuma thena hmun khat vel an hnai theih tawh. Kum tin Metric ton 1,460 vel thar chhuah mek a ni.
- Tuna Mizorama rubber ngah ber chu Er. CL Thangliana a ni a, kung 40,000 chuang nei mekin, thla khatah Rs nuai 21 vel a la lut mek nia sawi a ni.