Aizawl: Thawhtanni chawhnu khan Mizoram Synod chuan kum 1936-1954 chhunga Kristian Tlangau bua YLA/YMA thubelh tia YLA/YMA chanchin chhuah tel ve thin chu a hlawma hmun khata dah khawmin Central YMA an hlan.
Inhlanna hun hi Rev V. L. Luaia Hranleh, Executive Secretary i/c Archives Mizoram Synod-in a kaihruai a, Kennedy Lalhmangaiha, Archivist-in report pein, CYMA-in ama puala chanchinbu a neih hma, kum 1936-1954 chhung khan Kristian Tlangau-ah hian YLA/YMA thubelh tiin YMA chanchin chhuah thin a ni a, hengte hi Central YMA-in a copy an dil chu Synod Archives Committee chuan rem tiin a hlan a. A vaiin phek 1,524 zeta chhah a ni.
‘YLA/YMA thubelh’ bu hi Rev Dr. H.Remthanga’n CYMA General Secretary Prof Malsawmliana hnenah hlanin Kristian Tlangau bu nei kim tura an hmalakna a tar lang bawk.
CYMA aiawha thusawitu, general secretary chuan Synod Archive-in uluk taka an lo vawn that YMA chanchin chhui letna atana tangkai tak tur a hlan chu lawmawm tiin, phal taka hlantu Mizoram Synod chungah lawmthu a sawi a, hei hi YMA history tam tak tar lanna a nih avangin YMA tan chuan a hlu tak zet tih a sawi bawk.