Kum 2024 atan ZPM Gerenal Headquarters chuan an party office chu nimin khan kharna hun an hmang a. He hunah hian Chief Minister Lalduhoma chuan kalphung thar, mipui sorkarin kum khat chhung chauh pawhin ram rorelnaah danglamna tam tak a thlen tawh thu a sawi.
Lalduhoma chuan, “Sorkar kalphung dik hi kum tam tak kan lo aupui tawh a, Pathian leh mipuite zarah sorkarna chu kan lo chang ta a, engtiang takin nge he kalphung thar, mipui sorkar hian ram rorelnaah danglamna a thlen tih hi Zoram mipuite hian kan ngaihven a tul hle,” a ti.
Lalduhoma chuan kum khat chhungin Mizoram Legislative Assembly-ah speaker kaihruainain bill 46 an pass tawh a, dan siam that ngai leh her rem ngai eng emaw zat an siam tha tawh bawk a. Dan siam that ngai eng emaw zat an ennawn tawh a, heng an hmalakna reng reng hian a tum ber chu ram rorelnaa kalphung dik a nih rualin, chhungrila dikna an neih theihna tura kalphung thar mipui sorkar hmalakna a nih thu a sawi.
Ai-kal lak tihtawpte, sorkar hnathawkten hunbi an vawn dikna turte bakah inrenchemna kawngah theihtawpin hma an la tih sawiin chief minister hian, “Kan ram rorelna kalphung a lo dik theihna turin kawng tam takin hma kan la mek bawk. Kum khat chhungin kalphung thar mipui sorkar hian ram rorelnaah danglamna tam tak kan thlen tawh a ni,” a ti.
September 19, 2024 khan handholding policy an lo tlangzarh tawh tih sawiin chief minister chuan, “Kum 2047-ah Mizoram hi state hmasawn tia sawi kan lo nih ve theihna tura sorkar hmalakna a ni a, departmnet 15-in handholding policy hi an kalpui mek a, mipui pawhin an ngaihven hle a, kan thawhpui turte bank-te nen December 17, 2024 hian MOU kan ziak dawn a ni,” tia sawiin, thlai thar lei chungchangah campaign laia an lo sawi tawh thin angin collection centre hmun tam takah an siam mek a, chungah chuan kuthnathawktuten sorkar rate aia hniama sawhthing man a tlak apiangin an hralh thei dawn niin a sawi.
Lalchhuanthanga, MLA & Treasurer, ZPM Gen. Hqrs. kaihhruai inkhawmah hian Home Minister K.Sapdanga pawhin thu a sawi a. Inkhawmah hian ZPM Gen. Hqrs hruaitute bakah assembly speaker, deputy speaker, minister leh MLA te bakah board chairman leh ZPM party atanga AMC corporator-te an tel.
- Chief minister thu sawi dangte
- Dan thar, Mizoram Private Placement Agencies Regulation Bill 2024 an duang mek a, thalaite dan ang thlapa ram danga hna an thawh theihna turin ruahmanna kan siam mek.
- Mizoram Youth Commission Bill hmangin thalaite tan kawng kan sialsak dawn a, labour law 44 vel an neih mek hi mumal zawkin dan paliah kan khai khawm dawn.
- Zu khap burna dan (Mizoram Liquor Prohibition Act) pawh uluk tak leh fimkhur taka ennawn mek.
- Ram chhunga thil dehchhuahte ngaihlut a nih theih nan Mizoram Preferencial Store Purchase Rule 1994 pawh an ennawn mek hrulah, thil siamchhuahna hmun ngei atanga hmanraw tha leh tlawm zawk an lei theih nan Mizoram Procurement Preference Policy 1994 pawh siam rem mek niin, hei hian sorkar sum nasa takin a hum kan beisei bakah hmanraw tha zawk leh tlo zawk kan neih theih kan beisei.
- Industrial Policy 2024 pawh kan duang mek a. Thil siamchhuah lamah nasa taka hmasawn kan tum a ni. Mipuiin sorkar awlsam zawka an dawr theih nan Right to Public Service Act kan siam tha tawh bawk.
- Village Council Act kan neih mek hi a hlui tawh em avangin a thar kan siam dawn bawk a, autonomous district council-te pawh kan theih tawpin kan ngaihsak a, dan siam that ngai eng emaw zat kan siam thatsak tawh.
- Sorkar hnathawkte inkaihruaina Service Rules leh Recruitment Rules pawh siam that a lo tul tawh hle. Tunah hian chutiang Rules 63 zet chu kan siam tha tawh bawk.