P&E Minister F Rodingliana chuan kawlphetha megawatt 120 thar chhuah theihna tur, Tlawng Hydro Electric Project (HEP) siamna atan Detailed Project Report (DPR) buaipui mekin peih fel a nih veleh tihlawhtling tura kutthlak nghal a nih tur thu a sawi.
Thawhlehni khan P&E minister chuan Lungleng rama Tlawng khuahna tur hmunah thu thar thehdarhtute kawmin Tlawng khuah tur chungchang a sawi fiah a. Sorkar laipuia Ministry of Water Resources chuan Tlawng HEP Survey & Investigation (S&I) thawh nan leh DPR siam nan kum 2014 khan Rs. vbc 11.55 a ruahman a. February, 2015 atang khan Survey & Investigation tih tan niin tunah hian DPR siam pum turin hma an lak mek thu a sawi.
F Rodingliana chuan tuna an zirchian tawh atangin Tlawng HEP hi Aizawl bul hnai, North Lungleng bula siam tura ruahman a ni a. He project hian 120 MW a pe chhuak thei dawn a. North Lungleng bul, Tlawng-ah tuikhuah a ni dawn a. Tuikhuah san zawng hi meter 120 a ni ang a, tuikhuah hian khua leh in engmah a chim buai dawn lo va, thlai chin theih lohna ram hectare 2,888 leh thlai chin theihna ram hectare 187 vel chim tura ngaih niin a tuikhuah hi Thenzawl piah, Ramlaitui/Kawlhawk khua zawn vel thleng a awh dawn tih a sawi.
Minister chuan tunah hian CWC-in Topographical Survey te, Geotechnical investigation te, Seismic Study te, Construction material survey te an ti zo tawh tih a sawi a. Tuikhuah/dam siamna tur hmun a foundation study hi eng emaw chen kalpui tawhin lei chhungril awm dan zirchianna, drifting an la bak a. Hemi thawk tur hian tender koh tawh niin mi pathumin an chhang tih a sawi.
He hna hi tluang taka thawh a nih chuan thla li vel awh tura ngaih a nih thu sawin F Rodingliana chuan, “Drifting work hi zawh fel a nih veleh design te, cost estimate te thawh tan nghal a ni ang. Kum 2025 laihawl velah chuan DPR hi peih fel beisei a ni a. DPR hi peih fel a nih veleh Mizoram sorkar chuan he project tihlawhtling tur hian kut a thlak nghal dawn a ni,” a ti.
He project hian tui 1,009.6 million cubic meter a khawl theih dawn avang hian power generate nan a tui hmante chu Tlawng recharge-na tha takah a chang dawn tih a sawi a. Tun hnaia Aizawl khawpuiin thal laia harsatna a tawh thin, Tlawng lui atanga tui thianghlim duhkhawp pump chhoh tur awm lo fo thin pawh a sukiang nghal bawk dawn niin a sawi bawk.
F Rodingliana chuan an sorkar tirh veleh lui tui an khuap dawn tia an lo sawi thin angin tunah hian Tlawng te, Tuivai te, Tuichangte pawh kan khuakhirh nghal vek avangin, LSC a neih belh theih tawh loh a, neih belh chu dan bawhchhiatna a nih thu sawiin, “LSC neih belh chu dan bawhchhiatna a ni tawh dawn a ni. Ni dangah chuan kan khuap dawn tih hian LSC a pung vak a; mahse, tun tumah hian mipui hnena kan puanzar hmain revenue dept nen inrawnkhawmin heng luite hi an khuap dawn avangin tute pawhin LSC an neih belh tawh loh nan sorkarah lehkha kan theh lut a. Tunah hian kan lui khuah tur zawng zawng hi LSC lo nei a, lo Pata leh VC Pass te lo neih chu dah bawhchhiatna a ni tawh dawn a ni,” a ti.