Mizo Kristian rock band Drop Doubt pawhin kum thar lama an music video tur an buaipui tan der mai.
Drop Doubt hla thar tur hi ‘Hmangaihna’ tih a ni dawn a. He hla hi nakkuma an band-in kum 20 an tlin champha puala an music video thar tur a ni. An band phuah niin, a thluk hi music siam rualin an tiho a, a hla thu pawh an sawi hona atanga phuah a ni.
An hla thar tur ‘Hmangaihna’ chungchangah an band vocalist MS-a chuan, “Khawvel sum leh pai, thuneihna leh lalna te hi chu a la chuai dawn a, chu aia pawimawh zawk hmangaihna hi kan mamawh ber a ni, kan inhmangaih a, kan induhsak tawn a tul a. Indona te, inhuatna te, duhamna leh itsikna atan hringnun hi a tawi luai e.
Chuvangin, inhmangaih tawh ila, khawvel nuam i siam ang u… tih lam a ni,” tiin thalai times a hrilh.
Drop Doubt hian an music video thar tura band scene pawh ATC-ah shooting an zo tawh a. A music video-ah actor-te an neih dawn avangin, tun Inrinni lo awm tur hian shooting day 2 an nei leh dawn a ni.
‘Hmangaihna’ music video hi an peihfel a, an tihchhuah hun tur hi an la sawi chiang thei lo. Kumin hian audio leh video editing hi an zawh hman an ring lo a, kum thar lam hi an tinzawn mah zawk niin MS-a chuan a sawi bawk.
An hla thar tur hi Aeris Records, Chanmari West-ah recording an ti a. A video hi RDS Shots kutchhuak tur a ni.