FIFA Player the Year 2024 atan Real Madrid leh Brazil winger Vinicius Junior thlan a ni a, Doha khawpuiah he award hi hlan a ni.
Kum 24 mi Vinicius hian FIFA player award a dawng vawi khatna a ni a, season liam taah Real Madrid tanpuiin Champions League leh Spanish La Liga-ah an champion a, goal 24 thunin goal 11 a siam chhuak a ni.
Vinicius chuan award a lak hnuah, Sao Goncalo kawtthlerah ke lawnga inkhel thin a nih thu a sawi a, hetiang dinhmuna a awm ta hi thil theih loh tluka ngaih a ni, a ti.
Tun tum FIFA award hian August 2023 atanga August 2024 chhung awhin, an member ram tina chanchinbu mi pakhat, national team captain leh coach theuh bakah mipuiin vote an thlak a, FIFA hian ram tin captain leh coach-te vote thlak dan chip chiar a tar chhuak a ni.
Euro 2024 champion Spain midfielder Rodri chu pahnihna niin Vinicius tih loha vote hmu sang ber a ni a, Real Madrid leh England midfielder Jude Bellingham chu pathumnaah a awm a ni.
FIFA award bakah France Football Magazine buatsaih Ballon d’Or te hi football khawvela chawimawina sang an ni a, a hma kum hnih chhungin Lionel Messi-a hnenah FIFA best player award hlan a ni.
Real Madrid manager Carlo Ancelotti chuan coach of the year award a dawng a, kum 65 mi Italian hian 2016 hnua he chawimawina a lak leh hmasak ber a ni.
Hmeichhe lamah Barcelona midfielder Aitana Bonmati chu player of the year-a thlan a ni leh a, kum hnih a zawnin he ward hi a dawng a ni. Kum 26 mi Bonmati hian kum zawnin Champions League-ah Barcelona a champion-pui a, 2023 hmeichhe World Cup champion Spain team player pawimawh ni bawkin tournament chhunga player tha ber chawimawina Golden Ball award hlan a lo ni tawh a ni.