Aizawl: Mizoram sorkara Power & Electricity Department hnuaia Mizoram State Load Despatch Centre (SLDC) chuan India ram pum huap intihsiakna, Grid India leh Forum of Load Despatcher (FOLD)-in an buatsaih, Emerging LDC Category-ah 4th LDC Excellence Awards 2024 lawmman pakhatna a dawng.
Lawmman hlanna December 14, 2024 khan 23rd National Power System Conference, IIT Indore-ah neih a ni a. Mizoram P&E aiawhin Er. H. Zonunsanga, Engineer-in-Chief-in lawmman hi Central Electricity Authority (CEA) Chairman Shree Ghan Shyam Prasad hnen atangin a dawng a. E-in-C hi SLDC officer leh thawktuten an tawiawm.
He intihsiaknaah hian India ram pum chu category thumah then niin Emerging LDC Category (state leh UT 13 awmna)-ah lawmman pakhatna hi Mizoram P&E hnuaia SLDC hnenah hlan a ni a. Kum 2023 khan P&E Department Mizoram SLDC hi Top three-ah an lo inhlang kai tawh bawk.
State tina LDC-ten power source an neih leh power market an hman tangkai dan te, state capital tana islanding scheme an ruahman dan te, Grid Stability maintain-na tur a Automatic Demand Management System (ADMS) leh Under Frequency Relays (UFR) an hman dan te, cyber-security atan a invenhimna an neih te leh thawktute hmasawn zelna tur atana training an bawhzui dan te hmanga intihsiakna hi neih a ni a. Heng bakah hian interview leh presentation hmanga intihsiakna neih a ni bawk.
Power Minister F. Rodingliana chuan he lawmman dawn a nih theihna tur a rim taka thawktu zawng zawngte chungah lawmthu a sawi a, ram leh hnam tan theihtawp chhuah chhunzawm zel turin duhsakna a hlan nghal.