- Dr J.T.Vanlalngheta
‘Kut sil’ tihah hian ruai kil emaw thil ei dawna mahni kut sil thin pangngai, nachang kan hriat deuh vek ang hi ka rawn sawi tum a ni chiah lo va; ruai sa ei tur channa leh chawtani (chutney, salad, adt) siamnaa bung thinte hriat tur chungchang emaw a ni zawk mah.
Krismas-a ei tur sa channaah hian chan laklawh laia lungtât (tahreuh)a chem/sa channa tât hi kan la awm thin a, hetiang hi tih loh a tha; kan ti lo thei lo dawn a nih chuan sa, etc chan leh hmain chem kha fai taka sil leh thin ni se. Duh thu samah chuan sa chan tur fatu zawngte leh a puitu (an awm chuan) zawngte chuan sa channaah lungtat keng lovin in lamah an hmanruate tât hriam sa vek se a tha ber a. Sa chan laklawh laia chem bil kan han taha kan hrûk thuak thuak chauh emaw, hru lo emaw, sil fai leh lo emawa sa kan chan khan sa ti emaw, a thau leh sa dangah emaw te khan kan chem tahna thir nawi leh lungtât nawi, mihring mita hmuh mai theih lohte kha a then a zar chu, a hnua sa sila tla mai si lova bet leh lût tâwk a awm ang tih hi rin tur a ni. Saa thir nawi hmuh tham mang loh a awma ei tel chuan kaw chhhungah châmbâng tawk a awm thei a, chungte chu cancer emaw natna dang emaw thlentu an ni thei. Chuvangin, Krismas leh Kum Thar sa chan tura kal fatu ruat bik leh anmahni puitu zawng zawngte chuan chhum/kan (fry) tur leh chawtanite thianghlim taka buatsaih kan tum theuh dawn nia, chu chu kan zaa hriselna tur a nih bâkah, kan Pathian Thianghlima anna pawh a ni bawk ang.