- George L.Ralte; Member, MAL, MIPOTY & MDS
Kan naupan lai han ti ve khang lang ila,khang hun lai khan Krismas ni thlen hma chiah Krismas urlawk zan a lo thlen a, min ti phur thintu leh kan en chak thin leh a tuk Krismas ni zing a min ti hlimtu leh min ti lawm em emtu chu kan chhung ten kan dawh thlak tur naupang lawm chi hrang hrang min lei sak kan mutna bul a kan dawh thlak dahna tur thleng kan lo dah lawk a, kan dawh thlak tur kan en chak thin zia te kha min hriat chhuah tir thin.Fiamthu a kan nu leh pa ten min hrilh thin chu nizan a i dawh thlak kha Krismas puter pek che a nih kha tiin min hrilh thin a,(Mizoram ah chuan Krismas putar hi a hran pain kan nei lo niin a lang)tunlai hun ah erawh chuan naupang tam zawk te hi chuan Krismas urlawk zan (dawh thlak zan ti a kan sawi thin) te hi thleng vat vat se tihna chang pawh an hre hlawm tawh lo ni berin a lang.
Khawvelin Krismas putar a hriat tanna hi kum zabi 3-na vel atang niin an sawi a, Krismas putar hming ni a an sawi chu Nicholas niin Turkey ram khaw zinga pakhat Patara an tih a lo piang a, chhungkaw hausa tak atanga lo piang niin, a tet laiin a pain a thihsan a, a pa hnen atanga a rochun thil zawng zawng te chu mi harsa te hnen ah a sem fai vek a ni.He Krismas putar hi a hnu lawk ah Bishop ah hlan kai niin,tanpui ngai a hriat dan leh naupang a hmangaih dan te chu an hre lar hle niin an sawi.Hun rei lo te hnu ah Kristian te chu tih duh dah an tawrh thin avangin a bi bo ve ta a, mahse a hnu lawk ah man leh a ni ta tho a ni.Lung in atanga a chhuah hnu ni 6.12.343 AD khan a thi a, a lawina Kohhran Cathedral Church an tih ah an phum ta a ni.
He Krismas putar hi a dam laiin mi dang te tan a in hmang ral thin niin, naupang te hnen ah ei leh in tur bak ah an thawmhnaw hak tur thlengin a sem thin a ni.Tin he Krismas putar hian amahin a pe a ni tih hriat lohna turin a rukin a pe thin a,he Krismas putar pek a ni tih an lo hria a nih pawhin Pathian pek a ni tih ring turin leh hre turin a hrilh thin a ni.
Tum khat erawh chu Constantine an tih hian a mumang ah he Krismas putar hi hmuin sipai lal pathum tih hlum tur an chung thu rel fel tawh chu a chhuah leh phah niin an sawi.Mitin ten Santa Claus tih hming kan hriat lar em em hi kum zabi 17-na lai vel atang hman tan niin Santa Claus hi Krismas pa tih leh kumthar pa tih te pawhin Mizote chuan a hming hi kan ko thei awm e.
He Krismas putar hriatreng nan hian Krismas ah mi harsa leh chanhai te hnen ah Krismas thilpek te hlan thin niin Krismas putar lem kan neih thin te hi mahni in chhung ah tar liam mai lovin he Krismas putar hma lakna hlu tak hi hre reng chungin mi harsa te tan leh chanhai te tan malsawmna thlentu i ni zel ang u.