Aizawl: Mizoram Rural Bank (MRB) Chairman Sheryl Vanchhong chuan Mizoram Larsap Dr. Hari Babu Kambhampati chu Raj Bhavan-ah hmuin, MRB hmalakna, hmachawp leh mamawhte a sawipui.
Larsap Dr. Kambhampati chuan MRB hotute chu mipuiten bank kaltlanga hamthatna an dawn theihte bakah, bank hman tangkai dante an hriat chian lehzual nana tan la chhunzawm zel turin a chah a. Social Security Scheme leh loan pek chhuak lamah theihtawp chhuah chhunzawma, puih ngaite pui hreh lo turin a chah.
Sheryl Vanchhong chuan Mizoram khawpui leh thingtlang thlenga MRB a inzarpharh that thu sawiin, Social Security Scheme leh bank hman tangkai dan inzirtirna pawh tha taka an kalpui thu a sawi a. MRB chauh nilo, bank hrang hrang dawrtuten MRB hnuaia CSP te an dawr theih nana Aadhar authentication leh Inter Operable Micro ATM kaltlanga bank account hawn chunchanga harsatna awmte pawh sawi langin, he harsatna hi chinfel a nih theih nan thuneitu NPCI lama hmalak sak turin larsap a ngen.
MRB hian tun dinhmunah Mizoramah branch 105 nei mekin, hei hi Mizoram Bank awm za zela 40 a ni a, thingtlang bikah chuan za zela 73 an ni pha a ni.