Aizawl: Home Minister K Sapdanga kaihhruainain nimin khan home department hotute, Aizawl District Magistrate, Central YMA hruaitute leh kohhran hrang hranga thalai pawl hruaitute chuan kumina sorkarin halpuah leh halmawi khapna a kalpui chungchangah inkawm hona an nei.
Home minister pisa-a an inkhawmhonaah halpuah leh halmawiin hriselna a tha lo zawnga a nghawng nasat thu leh a tul loa sum leh pai khawhralna a nih thute sawi a ni a. Halpuah leh hal mawi khapna chungchanga sorkar hmalakna hrang hrangte sawiho niin khapna thupek bawhchhiatte man an nih dan leh an laka dan anga hmalak chhunzawm a nih dante sawi a ni bawk a. Hemi bakah hian central YMA-in tihtak zeta halpuah leh halmawi khapna a hlawhtlin theih nana hma a lak dante leh ruahmanna kalpui turte sawilan a ni bawk.
Kalkhawmte hian sorkarin halpuah leh halmawi khapna a kalpui hi a tha an tiin hlawhtling ngei se an ti a. Halpuah leh halmawi khapna a hlawhtlin theih nan thahnemngai leh lungrual taka hmalak ho zel an tum thu an sawi bawk.